Perezida wa Gasogi United KNC yakije umuriro ‘Malipangou ni umukinnyi wacu’
Perezida w’ikipe ya Gasogi United Kakooza Nkuriza Charles uzwi nka “KNC” yatangaje ko Malipangou Christian Yawanendji uri kuvugwa cyane muri Rayon Sports akiri umukinnyi ugifite amasezerano muri Gosogi United.
Mu gitondo cyo kuri uyu wa Gatatu tariki ya 27 Ugushyingo 2024, nibwo habyutse amakuru avuga ko uyu Munya-Central African Republic ashobora kwerekeza mu ikipe yambara ubururu n’umweru “Rayon Sports FC” bisobanuye ko yari yamaze gutandukana na Gasogi United.
Amakuru akavuga ko yari yamaze no gusezera bagenzi be bakinana muri Group bahuriramo byerekana ko uyu musore w’imayaka 22 ukina hagati mu kibuga yataka ibimugize byose byari inyuma ya Gasogi United.
Ubwo butumwa yahaye bagenzi be bwagiraga buti
“Ndabasuhuje mwese! Ndifuza gufata uyu mwanya , ngo nshimire umuryango mugari wa Gasogi United, harimo perezida Kakooza Nkuriza Charles, abatoza, abakinnyi dukinana,n’abafana b’ikipe b’indahemuka. Ubufasha bwanyu kunshyigikira no kungirira ikizere muri uru rugendo byari byiza, kandi ntewe ishema cyane n’ibyo twagezeho. No ngeye kubashimira nanone ku bw’ibyo twanyuranyeho ni ibihe byiza nzahora n’ibuka. Ndifuriza Gasogi United ishya n’ihirwe mu bihe biri imbere, no gukomeza kwitwara neza haba mu kibuga ndetse no hanze y’ikibuga.”
Kuri ubu rero amakuru agezwaho kuri uyu musore ni uko perezi w’ikipe yakiniraga Kakooza Nkuriza Charles uzwi nka “KNC” yigaramye ibi ndetse anemeza ko uyu mukinnyi agifite amasezerano muri iyi kipe ubwo rero akaba ari umukinnyi wayo.
Perezida wa Gasogi United Kakooza Nkuriza Charles uzwi nka “KNC” yagize Ati “Malipangou ni umukinnyi wa Gasogi United, afite amasezerano azarangira tariki ya 14 Kanama 2025.”