Umutoza wa Barcelona yatangaje abakinnyi babiri b’ingenzi atazaba afite ku mukino w’ejo w’ikirarane afitanye na Osasuna

Umutoza w’ikipe ya Barcelona Umudage Hansi Flick yatangaje ko abakinnyi be babiri Ronald Araújo na Raphael Dias Belloli uzwi nka “Raphinha” batazagaragara mu mukino bafitanye na Osasuna ukaba uw’ikirarane uteganyijwe ku munsi w’ejo wa tariki 26 Werurwe 2025.

Aba bakinnyi bombi bari mu rutonde rurerure rw’abakinnyi bari baragiye mu makipe y’ibihugu byabo, Ronald Araújo yakinnye umukino umwe mu mikino ibiri Uruguay yakinnye yo gushaka itike y’Imikino y’Anyuma y’Igikombe cy’Isi cya 2026, mu gihe Raphinha we yagaragaye mu mikino yombi Brazil yakinnye harimo n’uwo batsinzwemo na Argentine Bine kuri kimwe(4-1).

Kuri ubu Hansi Flick ahanganye bikomeye na Real Madrid na Atlético de Madrid mu rugamba rwa Shampiyona, uyu mukino nubwo ari uw’ikirarane ntibibujije ko Barcelona ifite umwanya wa mbere n’amanota 60 inganya na Real Madrid gusa kubera ko umukino ubanza wabahuje Barcelona ariyo yawutsinze bituma ifata umwanya wa mbere, Atlético de Madrid igafata umwanya wa Gatatu.

Nta minsi ishize ikinyamakuru The Athletic gisohoye Inkuru ivuga ko Barcelona ishaka gusinyisha Luis Díaz mu kwezi kwa Gatandatu bitewe nuko batizeye ko Raphinha azajya aboneka ku mikino yose , Kandi nk’uko iki kinyamakuru kibyemeza ababishinzwe bose muri Barcelona bamaze kubyemeranya icyaba gisigaye ni ukumva uruhande rwa Liverpool niba barekura uyu mukinnyi, amakuru ava mu bitangazamakuru bya Bongereza akemeza ko Liverpool yiteguye kureka Luis Diaz na Darwin Núñez bakishakira andi makipe.

Raphinha ni umwe mu bakinnyi bafite imibare myiza muri uyu mwaka w’imikino aho amaze kugira uruhare rw’ibitego 21 mu mikino 27, atsinda ibitego 13 atanga n’imipira 8 yavuyemo ibitego muri Shampiyona gusa, mu gihe Ronald Araújo amaze gukinira Barcelona imikino 5 muri uyu mwaka w’imikino bitewe n’imvune yagiye agira mu bihe bitandukanye.

BARCELONA VS OSASUNA

Date: 27/03/2025

Time: 22:00 PM

Stadium: Lluís Companys Olympic