Kuri uyu wa Kabiri tariki ya 6 Gicurasi 2025 ,Umugenzuzi Mukuru w’Imari ya Leta Alex Kanamugire yatangaje ko amafaranga ya Leta akoreshwa nabi yagabanutse, agera kuri miliyari 2,04 Frw mu 2024, avuye kuri miliyari 2,57 Frw.
Ibi uyu mugenzuzi Mukuru w’Imari ya Leta, yabitangaje uyu munsi ubwo yarimo kugeza ku Nteko Ishinga Amategeko, imitwe yombi, raporo y’Urwego rw’Ubugenzuzi Bukuru bw’Imari ya Leta y’umwaka w’ingengo y’imari warangiye ku wa 30 Kamena 2024.
Bwana Alexis Kamuhire, yavuze ko mu mwaka w’ingengo y’imari warangiye muri Kamena 2024, hagenzuwe ibigo 239 hasaganwa igipimo cy’amafaranga yakoreshejwe na Leta yagenzuwe kibarirwa kuri 96,1%, bingana na miliyari 6571 Frw.
Yanongeyeho ko ibigo n’inzego bya Leta 94% byabonye amanota meza mu bugenzuzi byakorewe mu mwaka w’ingengo y’imari warangiye tariki 30 Kamena 2024.
Muri ibi bigo n’inzego bya Leta kandi birimo ibyabonye raporo zitarimo amakosa (Nta makemwa) mu kubahiriza amategeko n’amabwiriza, bigera kuri 75% bivuye kuri 69%.
Mu kubyaza umusaruro amafaranga yashowe na Leta, inzego zabonye “Nta makemwa” zageze kuri 66% muri 2024 zivuye kuri 59% mu 2023 mu gihe mu gushyira mu bikorwa inama zitangwa n’Umugenzuzi Mukuru w’Imari ya Leta, byiyongereye bigera kuri 60% bivuye 59%.
Leta yagaruje miliyari 3,3 Frw muri miliyari 3,4 Frw yari yanyerejwe, yagombaga kugaruza mu mwaka w’ingengo y’imari wa 2023/2024 ndetse aya mafaranga yagarujwe n’ibigo birimo WASAC, MINICOM, RURA na REB.