One Direction:Zayn Malik yunamiye mugenzi we Liam Payne witabye Imana

Akiva mu muhango wo guherekeza no gushyingura mu cyubahiro umuhanzi Liam Payne uherutse kwitaba Imana, mugenzi we Zayn Malik babanye mu Itsinda “One direction”, yamwunamiye by’umwihariko mu gitaramo cye yakoreye aha mu Bwongereza.

Muri iki gitaramo, Malik mu guha agaciro mugenzi we uherutse kubavamo, yamwunamiye mu buryo bw’umwihariko, Aho yifashishije insakazamashusho ziri mu mabara y’ubururu n’umweru, mu nyandiko ikubiyemo umwaka Liam yavutsemo ndetse n’uwo yatabarukiyemo (1993-2024), abiherekesha amagambo agira ati:”Ndagukunda muvandimwe”.

Ubwo ibi byabaga hakinwaga indirimbo y’uyu muhanzi yitwa Stardust, amarangamutima y’abitabiriye iki gitaramo ntiyaboroheye, kuko bamwe kwifata byanze amarira agashoka.

Zayn yagiye agaragaza akababaro cyane ku rupfu rw’uyu mugenzi we, Aho mu gihe gitambutse taliki 17, Ugushyingo, abinyujije kuri Konti ye ya Instagram, uyu muhanzi yanditse ubutumwa bw’akababaro,
agira ati:”Naragukunze Kandi nkubaha bikomeye. Nzahora nzirikana mu mutima wange ibihe twagiranye. Nta magambo nabona yasobanura uburyo niyumva nonaha, ibinkikije byose byangiritse. Ndabizi ko aho uri ubu umeze neza Kandi ufite amahoro, urazi neza ukuntu ukunzwe”.

Kuwa gatatu w’iki cyumweru taliki 20, Ugushyingo 2024, abagize itsinda rya One direction, nyuma y’imyaka 8, batandukanye, bongeye guhurira mu muhango wo guherekeza mugenzi wabo Liam Payne.

Payne yatabarutse taliki 16, Ukwakira 2024, ubwo yahanukaga ku igorofa rya gatatu rya hoteli yo muri Argentine mu mugi wa Buenos Aires.