Youth Racing Cup 2024 : abarimo Simon Huppertz bahize abandi !
Kuri iki Cyumweru ubwo hari hasozwaga muri rusange irushanwa rya Youth Racing Cup 2024 Simon Huppertz yegukanye isiganwa ry’amagare ry’abatarabigize umwuga ryabereye muri Parking ya Stade Amahoro , Dore ibindi bihembo byatangiwemo :
Kuri iki Cyumweru, muri Parking ya Stade Amahoro hari kubera isiganwa ry’Umunsi wa 12, ari na wo wa nyuma w’iri rushanwa ryitabirwa n’abana bari hagati y’imyaka 11 na 19.
Nyuma y’iri siganwa habaye umuhango wo guhemba abakinnyi batatu ba mbere muri buri cyiciro hakurikijwe amanota bakoreye mu masiganwa 12 y’uyu mwaka wose wa 2024.
Aho Igiraneza Ogilla mu bakobwa na David Zanetti mu bahungu, begukanye Umunsi wa 12 wa Youth Racing cup, wakiniwe muri Parking ya Stade Amahoro.
Ni intsinzi ya karindwi mu masiganwa Igiraneza yitabiriye uyu mwaka mu gihe David Zanetti yabonye intsinzi ya munani uyu mwaka.
Mu cyiciro cy’abakobwa, Ndayishimiye Albetete mu bahungu na Umwamikazi Joy Cynthia begukanye iri siganwa mu batarengeje imyaka 13. Ni intsinzi ya 11 mu masiganwa 11 Umwamikazi yitabiriye uyu mwaka.
Naho muri rusange , uwitwa Liza Jehovayire ukinira ikipe ya Ndabaga Women Cycling Team mu bakobwa na Nyaruberwa Christian ukinira ikipe ya Les Amis Sportifs yo mu karere ka Rwamagana mu ntara y’iburasirazuba mu bahungu, begukanye Umunsi wa 12 ari na wo wa nyuma wa Youth Racing Cup mu batarengeje imyaka 15.
Muhawenimana Rafiki Jonathan mu bahungu na Masengesho Yvonne mu bakobwa, nabo begukanye iri siganwa mu batarengeje imyaka 17.
