Ikipe ya Watford yo mu cyiciro cya kabiri mu Bwongereza yamaze kumvikana na Bayern Munich ku igurwa rya Nestory Irankunda, rutahizamu w’imyaka 19 w’umunya-Australia, ku giciro kiri hafi ya miliyoni 3 z’ama-euro (€3m) hamwe n’amasezerano y’igihe kirekire azageza mu 2029.
Nk’uko bitangazwa n’umunyamakuru wizewe Fabrizio Romano, Bayern izagumana uburenganzira bwo kugura Irankunda ku giciro cyemewe (buyback clause), ndetse n’ubundi burenganzira bwo kugira inyungu ku kugurishwa kwe gukurikira (50% sell-on clause).
Irankunda, wavukiye muri Tanzaniya ariko akaba akinira Australia, yamenyekanye cyane ubwo yamenaga agahigo k’igura ry’umukinnyi muto mu mateka ya A-League yerekeza muri Bayern Munich mu mpeshyi ya 2024.
Ku myaka 15 gusa, yari amaze kwigaragaza nk’umwe mu bakinnyi bafite impano idasanzwe, ndetse aba umukinnyi wa gatandatu muto wakinnye muri shampiyona nkuru y’u Burayi (A-League).
Muri Adelaide United, Irankunda yakoreshejwe neza mu buryo bw’ingirakamaro n’umutoza Carl Veart, wamuhaye amahirwe akomeye binyuze mu kumushyira mu kibuga avuye ku ntebe y’abasimbura.
Mu mwaka w’imikino wa 2022/23, yatsinze ibitego bitatu bikurikirana mu mikino itatu, mbere y’uko atangira kubanzamo ku buryo buhoraho. Mu 2023/24, yatsinze ibitego 8 anatanga imipira 6 yavuyemo ibitego mu mikino 25.
Yaje no kugirwa umwe mu bakinnyi b’icyitegererezo mu mwaka, anashyirwa mu ikipe y’icyubahiro ya A-League All-Stars.
Mu gihe gito yamaze muri Bayern Munich, yagaragaye mu rugendo rw’imyitozo y’iyi kipe muri Koreya y’Epfo ndetse ajya no ku ntebe y’abasimbura ku mukino wa mbere wa DFB Pokal, nubwo nyuma yoherejwe gukinira Bayern Munich II, aho yatsinze ibitego 4 mu mikino 15.
Mu kwa mbere 2025, Bayern yamuhaye Grasshopper Zurich yo mu Busuwisi ku nguzanyo, aho yaje gutorerwa kuba umukinnyi w’ukwezi kwa Gashyantare, asoza amezi atandatu atanga ikizere nubwo atabashije kubona umwanya uhagije ku rwego mpuzamahanga.
Watford, iri kubaka ikipe ikomeye ishaka kuzamuka mu cyiciro cya mbere (Premier League), yizeye ko Irankunda azatanga imbaraga zidasanzwe ku busatirizi, aho azaba ahanganye no kubona umwanya n’abandi nka Vivaldo Semedo, Caleb Wiley, na Luca Kjerrumgaard.
Biteganyijwe ko Irankunda azakora isuzuma ry’ubuzima ku wa Kane mbere yo gushyira umukono ku masezerano y’imyaka ine. Nubwo Bayern yari ifite amasezerano amugeza 2028, uyu musore yahisemo kwerekeza aho yabona umwanya uhagije, cyane ko Vincent Kompany atari amufitiye gahunda yihariye muri Bayern.
Uyu ni undi mwanya ukomeye ku musore watangiye urugendo rwe rw’umupira afite inzozi, none arerekeje i Vicarage Road, aho azaba ari mu nzira nshya yo kugera ku rwego mpuzamahanga.
