Umukino wa shampiyona wagombaga guhuza apr fc na Rayon sports wahinduriwe itariki wari kuzaberaho!
Umukino w’Umunsi wa Gatatu wa Shampiyona wari guhuza Rayon Sports na APR FC tariki ya 14 Nzeri 2024, ntuzaba kuri iyi tariki kuko Ikipe y’Ingabo z’Igihugu yakomeje mu ijonjora rya kabiri rya CAF Champions League aho izahura na Pyramids FC yo mu Misiri ndetse umukino ubanza uteganyijwe hagati ya tariki 13-15 Nzeri.
Uyu mukino uba utegerejwe na benshi muri shampiyona uhuza APR FC na Rayon Sports, uyu mukino wagombaga kuzakinwa ari ku munsi wa Gatatu tariki 14 Nzeri 2024 saa kumi n’ebyiri z’umugoroba (18h00) kuri Amahoro Stadium nkuko bigaragara ku ngengabihe ndetse wari kuzabanzwa kwakirwa na Rayon Sports.
APR FC ifite igikombe cya Shampiyona giheruka na Police FC, ntizizakina umukino ubanza kubera ko zizaba ziri mu mikino Nyafurika, aho APR FC izasura Azam FC yo muri Tanzania muri CAF Champions League, mu gihe Police FC izakina na CS Constantine yo muri Algerie muri CAF Confederation Cup.
Rayon Sports nyuma yo kunganya na Marines FC, yongeye gutakaza ku Magaju FC banganya 2-2 mu mukino w’umunsi wa kabiri wa shampiyona y’icyiciro cya mbere mu Rwanda umwaka w’imikino wa 2024-25.
Guhangana ku makipe yombi, si ubuhanga bwo mu kibuga gusa kuko n’ak’abafana katiburira, yewe akenshi usanga baba bakaniye umukino kurusha abakinnyi, aba Rayon sports bita APR FC ‘igikona’ n’ aba APRFC bita Rayon Sports ‘Gasenyi’.
Nk’urugero Ubwo umukino wahuje amakipe yombi muri Mata 2019 wari urangiye, abafana b’impande zombi barahanganye, baterana amacupa n’ibindi bari bafite, ibi byaviriyemo amakipe yabo guhanwa na FERWAFA.
Umwaka wa 2017, ni wo wonyine aya makipe yabashije guhuramo inshuro nyinshi, dore ko yahuye inshuro eshanu mu marushanwa atandukanye, ibintu bitigeze bibaho mu mateka y’aya makipe yombi bikunda kuvugwa ko ahuzwa na Leta (ntashobora gukina umukino wa gishuti yiteguriye yo ubwayo).
Muri rusange kuva mu 1995, ufashe imikino ya shampiyona ukongeraho n’andi marushanwa izi kipe zagiye zihuriramo n’imikino ya gishuti n’ubwo itabaye inshuro nyinshi usanga Rayon Sports na APR FC zimaze guhura inshuro 91.
Muri izo nshuro zose hamwe Rayon Sports yatsinzemo imikino 29 naho ikipe ya APR FC itsindamo imikino 39, zinganya imikino 23.
Muri iyo mikino 91 habonetsemo ibitego 248, harimo 119 ku ruhande rwa Rayon Sports n’ibitego 129 ku ruhande rwa APR FC.
