Tuchel yemeye Kuba umutoza mukuru w’ikipe y’igihugu y’Ubwongereza

Mu nkuru dukesha ikinyamakuru BBC kiremeza ko gifite amakuru yizewe agaragaza ko umudage Tuchel ari we ugiye gutoza ikipe y’ igihugu y’Ubwongereza akaba agiye kuba umutoza wa gatatu udakomoka mu bwami bw’abongereza ugiye kubikora nyuma y’umutaliyani Fabio Capello ndetse n’umunyasuwede Sven Goran Erickson .

Intare eshatu z’abongereza zaburagaho gato ngo zuzuze amezi atatu nta mutoza mukuru zifite nyuma yo gutsindwa na Esipanye ku mukino wa nyuma w’igikombe cy’uburayi, ibi byaje no kuba intandaro y’isezera rya Gareth Southgate wari uyimazemo imyaka igera ku 8 dore ko yayinjiyemo muri 2016 nk’umusigire nyuma yigenda rya Sam Allardyce.

Biravugwa ko umusigire Lee Carsley washyizweho n’ishyirahamwe ry’umupira w’amaguru mu Bwongereza arabanza agatoza imikino ibiri y’amatsinda iyi kipe ifitanye n’ubugereki ndetse na Repubulika ya Irelandi mu kwezi gutaha kw’ugushyingo, Nyuma y’aho akaba ari ho umutoza Tuchel azakomereza.

Andi makuru aturuka mu binyamakuru byinshi byo mu Bwongereza avuga ko mu mpeshyi ishize, ishyirahamwe ry’umupira w’amaguru mu Bwongereza ryagerageje kwegera umutoza Pep Guardiola usanzwe utoza ikipe ya Manchester city , gusa ntiyagaragaza ubushake ,bityo bituma amaso bayerekeza kuri Tomas Tuchel dore ko nawe amenyereye umupira w’Abongereza.

Thomas Tuchel w’imyaka 51 yirukanywe n’ikipe ya Chelsea nyuma yo gutwarana nayo ibikombe bitandukanye birimo igikombe cy’isi cy’amakipe (club) ,igikombe cy’amakipe yitwaye neza I Burayi ndetse n’igikombe kiruta ibindi I Burayi.

Uyu mugabo Kandi yanyuze mu makipe akomeye nka Paris saint Germain , Borussia Dortmund ndetse n’ikipe ya Bayern Munich atigeze agiriramo amahirwe dore ko mu mwaka w’imikino ushize yabuze igikombe cya Shampiyona ibintu byaherukaga mu mwaka wa 2011, Uyu mugabo Kandi mu minsi ishize aherutse kwegerwa n’abamwe mu bayobora ikipe ya Manchester United gusa ibiganiro ntibyaje kugenda neza.

BBC yo, ivuga ko yaba ishyirahamwe ry’umupira w’amaguru mu bwongereza cyangwa se abahagarariye Tuchel nta numwe uragira icyo atangaza kuri aya makuru mu buryo bweruye.