Somalia : abantu barindwi bapfiriye mu iturika ry’igisasu cy’umwiyahuzi muri Mogadishu
Abantu barindwi bapfuye , abandi batandatu barakomereka nyuma y’uko umwiyahuzi yiturikirijeho igisasu kuri cafe hanze y’ishuri ryigisha abapolisi mu murwa mukuru wa Somaliya, Mogadishu.
Nk’uko abapolisi babitangaza, kuri wa kane abarimo abapolisi ndetse n’abasivili bari mu bahitanywe n’iki gisasu, ubwo barimo banywa icyayi hanze y’ishuri rikuru rya polisi rya Kaahiye.
Polisi yagize ati: “Igisasu cyaturikiye munsi y’ibiti aho abaturage bo muri ako gace bamara igihe kirekire cyo kuruhuka banafata agacyayi n’ikawa.”
Umutwe witwaje intwaro witwa Al-Shabab ufitanye isano na al-Qaeda, wavuze ko ari yo nyirabayazana w’icyo gitero. Uyu mutwe ukunze kwibasira inzego za gisirikare na Leta mu bikorwa byayo biba bigamije guhirika guverinoma ya Somaliya, biravugwa ko ariwo wagabye igitero simusiga.
Umuturage Mohamed Ali yatangarije ibiro ntaramakuru by’Abanyamerika ko yumvise urusaku rwinshi , ati: “Cafe yari yuzuyemo abantu bishimiye ubwo banywaga icyayi cyabo, hanyuma nyuma y’iturika ry’igisasu ibintu byose bihita biba akajagari”.
Abatangabuhamya bavuga ko abatabazi bahise bahagera nyuma y’iturika kugirango babashe gutabara ababashaga guhumeka umwuka w’abazima ,Inkeragutabara yo mu bitaro bya Madina yavuze ko abantu benshi bakomeretse gusa kuri ubu barimo kwivuza. Ati: “Turimo gukora ibishoboka ngo tuvure inkomere nyinsi, benshi muri bo bakomeretse bikabije.”
Muri Kanama, abantu barenga 30 baguye mu gitero cyagabwe ku mucanga rusange wa Mogadishu.
Guverinoma ya Sudan yashingiye cyane ku nkunga y’ingabo z’amahanga kugira ngo igume ku butegetsi. Yifatanije kandi n’imitwe yitwaje intwaro yo mu karere mu kurwanya al-Shabab , ibi bituma izi nyeshyamba z’umutwe wa Al -shabab zikomeza kugaba ibitero uko bishakiye .