Sérgio Conceição yagizwe umutoza wa AC Milan nyuma y’iyirukanwa rya Fonseca
Uwahoze ari umutoza w’ikipe ya FC Porto, Sérgio Conceição niwe wagizwe umutoza mukuru w’ikipe ya AC Milan nyuma y’iyirukanwa rya Paulo Fonseca.
Sérgio Conceição wahoze Ari umukinnyi wo hagati mu makipe atandukanye nka Lazio, Parma ndetse na Inter de Milan yasinye amasezerano y’amezi 18 atoza ikipe ya AC Milan.
Uyu mugabo w’imyaka 50 ukomoka mu gihugu cya Portugal, yatwaye ibikombe 11 mu myaka igera kuri 6 yamaze atoza FC Porto mbere yo kwegura mu mpera z’umwaka ushize w’imikino.
Uyu aje akenewe cyane i Milan dore ko afite ikizamini cya mbere ku italiki ya 3 Mutarama 2025, ubwo ikipe ya AC Milan izaba icakirana na Juventus mu mukino ubanza wa 1/2 mu gikombe cy’Ubutaliyani.
Uzaba ari umukino w’amateka ku mpande zombi dore ko ikipe ya Juventus azaba akina nayo, ikinamo umuhungu we Conceição.
Ikipe ya AC Milan, yafashe icyemezo cyo gutandukana na Fonseca nyuma y’amasaha make inganyije 1-1, n’ikipe ya AS Roma, mu mukino wabereye ku kibuga San siro.
Ni umukino wasize iyi kipe y’ubukombe ku mugabane w’Uburayi mu mazi abira dore ko yahise yisanga ku mwanya wa 8, mu gihe Atalanta na Napoli ziyoboye urutonde rwa shampiyona ziyirusha amanota 14.
Paolo Fonseca yageze mu ikipe ya AC Milan asimbuye Stefano Pioli wibukirwa kuri byinshi birimo kugeza iyi kipe ku mwanya wa kabiri ubwo shampiyona y’umwaka ushize yarangiraga ndetse akaba ariwe wahaye AC Milan igikombe cya shampiyona cya mbere mu myaka 11,ubwo yagitwaraga muri 2022.
Tubibutseko AC Milan yisanga ku mwanya wa 12 mu makipe 36 yitabiriye irushanwa rya UEFA champions league nyuma yo gutsindwa inshuro 2, bagatsinda izindi 4, mu mikino 6, iyi kipe yabashije gukina.