Rwanda Premier League yatanze umurongo ku isubikwa ry’umukino wa Rayon Sports na Apr fc
Rwanda Premier League yatangaje ko yakiriye ubusabe bwa APR FC yifuza kubanza gukina na Rutsiro na Bugesera mbere yo guhura na Rayon Sports .
Aya makipe ahora ahanganye kurusha ayandi mu Rwanda, yagombaga kuzacakiranira kuri Stade Amahoro tariki 19 z’uku kwezi mu mukino w’ikirarane cy’Umunsi wa Gatatu wa Shampiyona wagombaga gukinwa tariki 14 Nzeri ubwo APR FC yahuriraga na Pyramids FC kuri iki kibuga.
Hakaba n’andi makuru avugwa ko nyuma y’umukino w’u Rwanda na Bénin uteganijwe tariki ya 15 Ukwakira 2024, ikibuga cya Stade Amahoro kizaba gihagaritswe gukoreshwa kugira ngo kibanze gitunganywe neza ndetse hanakorwe imwe mu mirimo itari yarangiye neza.
Niyitanga Desire wahoze ari umuyobozi wa Gicumbi gusa kuri ubu akaba ari umwe mu bayobozi ba Rwanda Premier League aganira na kimwe mu bitangazamakuru bikorera hano i Kigali yatangaje ko bakiriye ubusabe bwa APR FC bubasaba ko umukino utakinwa kuri iyi tariki gusa yavuze ko bo nka Rwanda Premier League batari babasubiza iyi ikipe y’ingabo z’igihugu .
Mu kanya gashize , ubuyobozi bwa Rwanda Premier League bumaze gusohora itangazo ryemeza ibyo Desire yari yatangaje , iri tangazo ryagiraga riti ” Rwanda Premier League iramenyesha abakunzi b’umupira n’abanyarwanda muri rusange ko yakiriye ubusabe bwa Apr fc ko mu gupanga imikino y’ibirarane y’iyi ikipe hakitabwa ku munsi byari gukinirwaho uko bikurikirana hagendewe ku ngengabihe ya shampiyona 2024 -25 .”
Gusa Rwanda premier league yongeyeho ko itarafata umwanzuro kuri ubu busabe gusa ko icyemezo kizafatwa mu gihe gikwiye .
Kurundi ruhande aganira n’igitangazamakuru cy’Igihe ,Umuvugizi wa Rayon Sports, Ngabo Roben, yibajije niba APR FC izajya ihitamo igihe ikinira n’ikipe zigomba guhura. ubwo yari abajijwe ku kibazo cy’uko umukino wari guhuza aya makipe akomeye mu Rwanda ku wa 19 Ukwakira 2024, wasimbujwe uwa APR FC na Gasogi United.
Rayon Sports imaze imikino ibiri yitwara neza, ifitanye umukino wa gicuti na Mukura VS ku Cyumweru, mu gihe APR FC iteganya kuzakina uwa gicuti na Gasogi United ku wa Gatatu w’icyumweru gitaha.