Rwanda premier League : Rayon Sports yafashe umwanya wa mbere nyuma yo kuva i Musanze amahoro !
Ikipe ya Rayon sports fc yatsinze ikipe ya Musanze igitego kimwe ku ubusa cyatsinzwe n’umugande Charles Bbale mu umukino w’umunsi wa Cyenda wa Shampiyona waberaga kuri Stade Ubworoherane iherereye mu karere ka Musanze .
Uyu wari umukino wari witezwe n’abatari bake nyuma yuko Rayon Sports yari iri mu bihe byiza nyuma yuko yari iherutse kwandagaza bikomeye cyane mukeba wayo Kiyovu sports iyitsinze ibitego bine ku busa gusa ariko kurundi ruhande uyu wari umukino Musanze yari igiye gukina idahagaze neza nkuko byari bimeze umwaka ushize.
Musanze yari ku mwanya ku mwanya wa cyenda n’amanota arindwi mu gihe Rayon Sports bagiye guhura yo iza ku mwanya wa gatatu n’amanota 15 mu mikino itandatu ndetse iyi Ikipe y’umunya – Brazil Robertinho yari yaratsinze imikino ine iheruka gukina muri Shampiyona yahuriyemo na Gasogi United,Rutsiro, Bugesera na Kiyovu Sports .
Ikipe ya Rayon Sports itozwa na Roberto Oliveira Gonçalves do Carmo wamenyakanye nka Robertinho yari yabanje mu kibuga abarimo Khadime Ndiaye mu izamu, Fitina Omborenga , Bugingo Hakim , Nsabimana Aimable , Kabange Emmanuel , Roger Kanamugire , Richard Ndayishimiye , Muhire Kevin , Fall Gnagne , Bassane na Iraguha Hadji .
Kurundi ruhande ariko ikipe ya Sosthene yari yanakiriye uyu mukino yari yahisemo gukoresha abarimo Nsabimana Jean de Dieu bakunze kwita Shaolin mu izamu , Nkurunziza Felicien , Kwizera Tresor ,Muhire Anicet Gasongo , B. Shafik , Komfor Bertrand , Solomon Adeyinka , Ntijyinama Patience , Bizimana Valentin , Adeshora Johnson na Leshabi Niathaba .
Uyu mukino wari wanitabiriwe na bamwe mu bahoze bayobora ikpe ya Rayon Sports nka Gacinya Denis na Sadate Munyakazi, abahoze bayiba hafi nka Furaha Jean Marie Vianney na Martin Rutagambwa, ababaye abanyamabanga bayo Namenye Patrick na Gakwaya Olivier ndetse n’abandi benshi .
Igitego rukumbi cyabonetse muri uyu mukino cyaje ku munota wa 51′ mu gice cya kabiri ubwo Muhire Kevin yashyiraga umupira mu rubuga rw’amahina uvuye muri Corner, umunyezamu Shaolin arasohoka ntiyawukoraho hanyuma usanga umugande Charles Baale awufunga neza awutereka mu izamu.
uyu mukino warangiye , Ikipe ya Rayon Sports itsinze Musanze igitego 1-0 ifata umwanya wa mbere muri Shampiyona ndetse Iyi kipe izongera kumanuka mu kibuga ku wa Gatandatu ihura na Etincelles mu mukino w’ikirarane uzabera kuri sitade yitiriwe ikirangiirire cyakanyujijeho muri ruhago yo hambere uyu ntawundi ni umunya- Brazil Edson Arantes do Nascimento uzwi nka Pele iherereye i Nyamirambo.