Rutahizamu uri mu bakomeye i Burayi Barcelona yashakaga ntibigikunze ko imubona
Ikipe ya Barcelona ifite ibibazo by’ubukungu byari byitezwe ko izasinyisha rutahizamu wa Lille Jonathan David ku buntu, byatangajwe ko itazamusinyisha nubwo uyu musore yari yaciye amarenga ko nawe yifuza gukinira iyi kipe.
Uyu rutahizamu w’Umunya-Canada ni umwe mu beza bari ku Mugabane w’Iburayi badahenze kuko afite amasezerano ari kugana ku musozo dore ko azarangirana na tariki 30 Kamena 2025.
Iyi kipe y’i Barcelona isanzwe ifite rutahizamu uyatakira Umunya-Poland Robert Lewandowski kandi muri uyu mwaka w’imikino ari kwitwara neza mu mibare dore ko amaze kugira uruhare rw’ibitego 18 mu mikino 18 muri shampiyona.
Gusa uyu musore imyaka ye iri kugenda ikura ku buryo iyi kipe yari yaratangiye umushing wo gushaka umusimbura we w’igihe kirekire bityo rero akaba amahitamo yari uyu musore w’ikipe ya Lile Jonathan David kuko nta mafaranga menshi bari kumutangaho.
Uyu rutahizamu w’imyaka 24 Jonathan David, ni umwe mu bari kwitwara neza muri uyu mwaka w’imikino aho amaze kugira uruhare rw’ibitego 12 mu mikino 15 , atsinda ibitego 11 anatanga umupira 1 wavuyemo igitego muri shampiyona gusa.
Muri UEFA Champions League uyu mwaka Jonathan David amaze kugira uruhare rw’ibitego 9 mu mikino 10 amaze gukina atsinda ibitego 6 anatanga imipira 3 yavuyemo ibitego.
Si uyu mukinnye wenyine Barcelona ihombye kubera ibibazo bishobora kuba byiganjemo iby’ubushobozi dore ko mu minsi ishize urukiko rw’ubucuruzi muri Esipanye rwafashe umwanzuro ko Barcelona ihawe itariki ya 31 Ukuboza 2024, kuba yandikishije Dani Olmo ndetse La Liga yarabyemeje ko ari cyo gihe igomba ku bikora.