Russia : Umunyamerika yafungiwe kurwana muri Ukraine
Mu Burusiya, urukiko rwakatiye Umunyamerika w’imyaka 72 y’amavuko igifungo cy’imyaka hafi irindwi ashinjwa “kurwana muri Ukraine.”
Ubushinjacyaha buvuga ko Stephen Hubbard yasinyanye kontaro n’igisirikare gato Uburusiya bumaze gutera Ukraine mu kwa kabiri mu 2022, ajya kukirwanirira. Bwemeza ko yahembwaga amadolari igihumbi ku kwezi kandi ko yafatiwe ku rugamba kw’itariki ya 2 y’ukwa kane 2022 mu mujyi wa Izyum, mu burasirazuba bwa Ukraine, aho yari aranatuye kuva mu 2014.
Ikigo ntaramakuru RIA cya leta y’Uburusiya gitangaza ko abavoka ba Stephen Hubbard bazajurira.
Urubanza rwe rwabereye mu muhezo. Igitangazamakuru cya leta y’Uburusiya RIA bihamya ko yiyemereye ibyaha by’ubucanshuro. Yakatiwe gufungwa imyaka itandatu n’amezi icumi. Umushinjacyaha yashakaga igihano cy’imyaka 15 ariko asaba urukiko kwita ku nyoroshyabyaha z’ubukure bwe no kwemera icyaha.
Umuvugizi w’ambasade ya Leta zunze ubumwe z’Amerika i Moscou yabwiye ikigo ntaramakuru Reuters cyo mu Bwongereza ko “babizi ko hari Umunyamerika ufunze” ariko yanga kugira icyo arenzaho.
Uretse Stephen Hubbard, Uburusiya bufite muri gereza zabwo abandi Banyamerika icyenda. Kw’itariki ya mbere y’ukwa munani gushize, Uburusiya n’ibihugu bimwe na bimwe byo mu burengerazuba bw’isi bahanahanye abanyururu babikomokamo 24. Ni bo ba mbere benshi nyuma yo gusenyuka kw’icyahoze ari Repubulika z’Abasoviyete. Barimo Abanyamerika batatu.