RIB yatanze gasopo ku banyamakuru ba Siporo mu Rwanda bakomeje kumvikana basebanya mu ruhame !
Urwego rw’Igihugu rw’Ubugenzacyaha (RIB), rwasabye abanyamakuru byumwihariko abakora ibiganiro bya Siporo, kwigengesera mu mvugo bakoresha, kuko batikubise agashyi ngo bazigorore, hari amahirwe menshi yuko bamwe muri bo ibi bishobora kuzatuma bisanga imbere y’ubutebera .
Abanyamakuru ba Siporo hano mu Rwanda bamaze iminsi bumvikana bitana ba mwana ndetse n’urunturuntu hagati yabo basabwe ko bakwiye kwitwararika mu mvugo bakoresha, bakirinda gusesereza abo bafite ibyo batumva kimwe nkuko uru rwego rubitangaza .
Umuvugizi wa RIB, Dr Murangira B Thierry we ntiyatinye guhamya ko kandi batikubise agashyi ngo bikebure, hari igihe bashobora kuzarengera bakaba bagoresha imvugo zisenya zikaba zateza ibibazo mu muryango mugari w’Abanyarwanda usanzwe ushingiye ku bumwe bwabo.
Aho yagize ati : “Mbafitiye ubutumwa: Kwirinda kwibasira abantu bishingiye ko afana iyi kipe wowe udafana; Gukoresha amagambo akomeye, bavuga ku bantu, binjira mu buzima bwite bw’umuntu, abakoresha imbuga nkoranyambaga bibasira abandi, siporo si intambara.
“Bashobora kuzashyokerwa ugasanga barimo gukoresha imvugo zikurura urwango, ibyo rero babyitondere.”
Mu minsi ishize humvikanye abanyamakuru ba siporo ku bitangazamakuru bitandukanye bakomeje kumvikana ku mbuga nkoranyambaga ndetse no mu biganiro by’imikino bashinjanya byinshi birimo kwaka indonke, gutegura imikino ndetse no gusinda mu ruhame.
Ibi bikaba byaratangiye kuvugwa ku mugoroba wo ku Cyumweru, tariki ya 10 Ugushyingo 2024, binyuze kuri Instagram ubwo Umunyamakuru wa Radio 10, Mucyo Biganiro Antha, yaganiraga n’abakinnyi b’umupira w’amaguru, Usengimana Danny na Byiringiro Lague.
Antha yagarutse ku byo amaze iminsi ashinjwa n’abakunzi ba APR FC ko ari umwe mu bayishe kuko yayiguriye abakinnyi badashoboye, avuga ko nta mukinnyi yaguriye iyi kipe ndetse ko ababivuga ari abamufitiye ishyari aho yanabashinje ibintu bitandukanye.