Real Madrid ivunikishije inkingi za mwamba amahirwe atangira gusekera Barcelona kuri El Clásico ibura iminsi 4
Ikipe ya Real Madrid izakina umukino na Barcelona (El Clásico) muri izi mpera z’icyumweru idafite abakinnyi babiri bayo b’ingenzi barimo umuzamu Thibaut Courtois ndetse na Rodrygo Silva de Goes.
Mu mukino ikipe ya Real Madrid yanyagiyemo ikipe ya Borussia Dortmund ibitego bitanu kuri bibi(5-2) niwo mu kino aba bombi bavunikiyemo dore ko nka Rodrygo Goes yavuyemo ku munota wa 85’ asimburwa n’Umufaransa Aurélien Tchouaméni.
Umubiligi Thibaut Courtois mu mwaka ushize w’imikino yari yarasaritswe n’ibibazo by’imvune ku buryo imikino myinshi yakinwe n’Umunya-Ukraine Andriy Lunin ndetse anafasha iyi kipe ya Real Madrid kwegukana UEFA Champions League ndetse na shampiyona y’igihugu ya Esipanye, bisobanuye ko uyu muzamu w’imyaka 25 agiye gusubira mu biti bitatu by’izamu.
Mu gihe Rodrygo Goes nubwo ari umwe mu bakinnyi beza gusa Real Madrid ifite ibindi bisubizo byinshi ku murongo wabataka izamu.
Ku munsi wo ku wa gatandatu ikipe ya Real Madrid nibwo izakira Barcelona ku munsi wa 11 wa shampiyona kuri Santiago Bernabéu ku isaha y’I saa tatu idafite aba bakinnyi bombi mu gihe bazaba barwana no gukuramo amanota atatu ikipe ya Barcelona ibarusha ku rutonde rusange rwa shampiyona.
Bizanayikomerera kubera ko Barcelona iri kugarura abakinnyi bayo barimo Gavi, ndetse na Dani Olmo bari baragize ibibazo by’imvune, ukongeraho n’ibihe byiza abakinnyi b’iyi kipe barimo ndetse n’umutoza wabo Umudage Hansi Flick.
Abo bakinnyi barimo Umunya-Poland Robert Lewandowski umaze gutsinda ibitego 12 n’imipira 2 yavuyemo ibitego, Raphael Dias Belloli, uzwi nka Raphinha umaze gutsinda ibitego 5 n’imipira 5 yatanze yavuyemo ibitego, ndetse na Lamine Yamal umaze gutsinda ibitego 4 n’imipira 6 yatanze yavuyemo ibitego muri shampiyona gusa .
Gusa ba rutahizamu ba Real Madrid nabo bafite imibare myiza muri shampiyona dore Vinicius Junior wenyine abaze gutsinda ibitego 5 agatanga n’imipira 4 yavuyemo ibitego mu gihe umufaransa Kylian Mbappé Lottin amaze gutsinda ibitego 6 atanga n’umupira 1 uvamo igitego .