“Rayon vs Kiyovu” inkomoko y’ihangana ry’igihe kirekire

Mu nkuru igaruka ku busesenguzi bw’abanyamupira batandukanye, Daily Box iragaruka ku nkomoko y’ihangana rya Kiyovu sports na Rayon sports.

“Twibukiranye”

Byagenze gute ubwo byavugwaga ko Kiyovu yashyinguwe ku mbehe yayo ku Mumena ?

Iyo uteye icyumvirizo kuri bamwe bakurikiye umupira wo hambere bakubwira ko, ihangana rya Kiyovu na Rayon rimaze igihe kirekire, ndetse abenshi bakubwira ko,guhera mu myaka y’i 1965,umupira wabaga wahuje Kiyovu na Rayon sport wabaga ari indya nkurye dore ko, ari nawo mukino witabirwaga n’abafana benshi.

Muri iki gihe byorohera umufana wa Kiyovu Sports kukubwira ko,ahanganye na Rayon sports mu gihe uwa Rayon we adasiba kukumvisha uburyo mukeba we ari abo ku Kimihurura.

Hari ku isaha ya saa kumi n’imwe n’igice(17hr30min) ku munsi wa 15 w’ukwezi kwa Kamena, ubwo ikipe ya Kiyovu sports yashinzwe mu 1964 yamanukaga mu kiciro cya kabiri. Ni mu mukino yatsinzwemo ibitego 2-1 n’ikipe ya Rayon sports kuri stade yo ku Mumena.

Inkomoko ubukeba bw’igihe kirekire bwa Kiyovu sports na Rayon sports

Mu kiganiro yagiranye n’ikinyamakuru Igihe, uwahoze ari umunyamabanga wa FERWAFA,umusifuzi mpuzamahanga ndetse agakinira n’ikipe ya Kiyovu sports Gasingwa Michel,yatangaje ko, mu gihe cyabo, ubukeba bwa Kiyovu sports na Rayon sports, bwari ku rwego rudasanzwe.

Ati “Icyo gihe ubukeba bwari bukomeye hagati ya Rayon Sports na Kiyovu Sports nubwo hari Panthère Noir yari mu makipe akomeye atwara ibikombe.”

akomeza agira ati ” Guhangana kwari hagati y’amakipe yombi muri iyo myaka kugeza mbere gato ya Jenoside yakorewe Abatutsi mu 1994.” Dusubije amaso inyuma gato reka dusubire mu mwaka w’i 1968 ku mukino wa nyuma(final) wari wabereye i Kabgayi dore ko ari wo mukino ufatwa nk’intangiriro y’ihangana ryaya makipe yombi.

Ari umusifuzi cyangwa abafana, nta numwe mu bari ku kibuga cya Kabgayi wari uziko aya makipe yakinaga, yari kuzubaka ihangana ry’igihe kirekire, mbere gato ko umukino utangira habayeho kwikanga ko Kiyovu yazanye abakinnyi badafite ibyangombwa dore ko, yari yazanye Mashini, yari yakuye i Bukavu ni mu gihe, uwashinjwaga nawe yashinjaga Rayon gukinisha uwo bita Runyinya Barabwiriza, wari mu byamamare by’umupira w’icyo gihe mu Rwanda, umukino wo warakinwe gusa ibyavuyemo birasubikwa kubera ikibazo cy’ibyangombwa.

Mu mukino wa kabiri usubukuye ikipe ya Kiyovu sports yanyagiye ikipe Rayon sport ibitego 4-2 maze yegukana igikombe.

Igihe Muvara na Tindo bababazwa no gutsindwa na Rayon

Uko imyaka yagendaga izamuka niko n’ihangana ryagendaga rikomera. Mu mwaka w’imikino wa 1981/1982, ubwo ikipe ya Kiyovu sports yasinyishaga Muvala Valens na Tindo Bulongo ibakuye muri Vital’o y’i Burundi maze mu mukino wabo wa mbere bakirizwa 2-1 bya Rayon umukino wari wabereye ku kibuga stade de l’amitié ku Mumena.

Nkuko umusesenguzi akaba n’umunyamakuru w’imikino Gakuba Abdoul Djabar bakunze kwita Romario abivuga, avuga ko uyu mukino wababaje cyane Muvala na Tindo dore ko bari bavuye i Burundi baguzwe akayabo, akomeza avuga ko, icyo gihe aba bagabo bahize ko Kiyovu sports itazigera yongera gutsindwa na Rayon sports mu gihe bakiyirimo.

Imvugo yabaye ingiro koko dore ko kuva ubwo Rayon Sport itongeye gutsinda Kiyovu sports, cyakoze igikomeye yakoze ni ukunganya, ibintu byamaze imyaka 7 kugeza Ubwo Muvala Valens yatundukanaga na Kiyovu akajya gukina mu Bubiligi.

“Raul Shungu” imana y’ Abarayon !

Nyuma y’imyaka 7 Rayon sports idakoramo, kera kabaye haje izina abenshi mu Bareyo bafata nk’umucunguzi w’ikipe “Raul Shungu”.

Mu 1989 nibwo Raul Jean Pierre Shungu wari uturutse i Rusizi( cyangugu) mu ikipe ya Espoir yageze muri Murera ubwo yari azanye na abakinnyi batandukanye barimo na kizigenza Witakenge Janot n’abandi benshi.

Uyu yari yabengutswe na Rayon sports mu mukino wa nyuma w’igikombe cy’igihugu yari yatsinzemo Espoir yatozwaga na Raul igitego 1-0, igitego cyatsinzwe na Alpha Nkunzumwami.

Ikipe ya Rayon sports yongeye gutsinda Kiyovu sports nyuma y’igihe kirekire, mu irushanwa ryari ryateguwe n’uruganda rwa BRARUDI rw’i Burundi, irushanwa ryarimo amakipe ane ari yo Kiyovu sports, Rayon sports hakiyongeraho Inter star ndetse na Vital’o z’i Burundi.

Muri iri rushanwa niho Rayon sport yafashe umwanya mwiza wo gutsinda Kiyovu noneho ikabikorera mu mahanga aho buri wese abibona, ntibyatinze maze ikipe ya Kiyovu sports ihura na Rayon sports ku mukino wa nyuma w’iryo rushanwa, umukino Rayon yatsinzemo Kiyovu 1-0 igitego cyatsinzwe na Sembagare Jean Chrisostome, kuva ubwo Abarayon bariruhutsa batangira guhumeka nyuma y’igihe kirekire Kiyovu ibacisha hirya no hino ikabatsinda badakozemo.

Kiyovu Sports yabitse urupfu rwa Rayon Sports maze iyi yo iza kuyishyingura mu 2017

Nk’uko twatangiye tubivuga, ubwo Rayon Sports yari imaze kumanura Kiyovu Sports mu cyiciro cya kabiri mu 2017, abafana bayo bazanye imisaraba bayishinga kuri stade Mumena ndetse baririmba indirimbo zigaragaraza ko bayihashyinguye.Ibi byasaga no kwihimurira kuri Kiyovu Sports yigeze gutanga itangazo ryo kubika kuri Radio y’igihugu rikanasomwa, ivuga ko ibabajwe n’urupfu rw’umugore wayo Rayon Sports, kandi ko imihango yo gushyingura iteganyijwe kubera kuri Stade Regional(Kigali Pele stadium) ku munsi no ku isaha bari bafitanyeho umukino.

Icyo gihe Kiyovu Sports yamenyeshaga inshuti n’abavandimwe ari bo Mukura VS, Etincelles FC, Panthere Noire FC ndetse na Mukungwa.

Bivugwa ko ibyo byakuruye inzika n’inzigo hagati y’amakipe yombi, ari nayo mpamvu nta mpuhwe na nkeya Rayon Sports yari kugirira Kiyovu Sports kuwa 15 Kamena 2017, ubwo yayimanuraga mu cyiciro cya kabiri, abafana bakayishyingura ku Mumena.

Inkomoko y’izina “Gasenyi”

Izina Gasenyi rimaze kumenyekana haba mu ndirimbo zaririmbwa n’abafana ba APR FC n’ahandi, bivugwa ko ryaje mu 1987, ubwo abari abanyamuryango bakomeye ba Rayon Sports barimo Murego Donat, bari no mu bayifashaga bimurwaga bakavanwa i Nyanza bazanwa i Kigali, dore ko ari na bwo urukiko rukuru rw’Ikirenga rwari rukuweyo rukazanwa mu murwa mukuru.

Icyo gihe byabaye ngombwa ko na Rayon Sports yimuka, maze bahita bayishakira umuterankunga, aboneka ari Rwandex Shilington, uruganda rutunganya Ikawa, iyi kipe ihita itangira kwambara umwambaro wanditseho Rwandex imbere mu gatuza.

Ubusanzwe gasenyi ni udushishwa tw’ikawa twajyaga twifashisha mu gucana imbabura no gutwika amatafari, ariko iyo turunze umuyaga ugahuha turaguruka ukabona ari twinshi cyane.

Aho rero niho izina Gasenyi ryaziye maze bagahuza twa dushishwa tw’ikawa n’ubwinshi bw’abafana, ndetse n’izina ry’umuterankunga iyo kipe yari ifite, maze ubwo bamaraga kuyitsindira kuri Stade Regional(Kigali Pele), Rayon Sports imanutse i Nyamirambo n’abafana bayo, Abayovu biyicariye Tarinyota za Majengo kuri 40 no mu bice bihakikije bati “Ngiyo Gasenyi irahise”.

Birashoboka cyane ko twaba dushonje duhishiwe dore ko mu mukino uteganyijwe kuri uyu wa gatandatu, Abayovu batari mu bihe byiza, bahiga kuzukira kuri Rayon mu gihe, Abarayon bazanzamutse mu minsi ishize nbo, bahiga guhuhura Kiyovu.