Ikipe ya Rayon Sports biteganyijwe ko igomba gukora imyitozo kuri iki cyumweru nyuma yo gukurirwa inzira ku murima na FERWAFA ku ngingo yo gutera mpaga Mukura VS
Kuri uyu wa Gatandatu wa tariki 19 Mata 2025, Rayon Sports nibwo yari yasuye ikipe ya Muhazi United ku munsi wa 24 wa Shampiyona, umukino wabereye ingoma Rayon Sports ikanabyitwaramo neza itsinda iyi kipe ibitego bibiri ku busa(2-0).
Ni ibitego byatsinzwe na Adama Bagayogo ku munota wa 65′ na Bigirimana Abbedy ku wa 68′ w’umukino, ukaba n’umukino watojwe na Rwaka Claude nyuma y’ihagarikwa rya Roberto Oliveira Gonçalves do Carmo “Robertinho”.
Kuri iki Cyumweru, Rayon Sports igomba gutangira imyitozo , bisobanuye ko amahirwe menshi bagomba gukina umukino wa Mukura VS w’igikombe cy’Amahoro wasubitswe kubera ibura ry’umuriro kuri sitade ryatewe no gupfa kwa moteri icanira sitade umukino ugahagarara ku munota wa 27′.
Perezida wa Rayon Sports, Twagirayezu Thadee, yari yaratangaje ko bazemera bagaterwa mpaga niba FERWAFA idakurikije amategeko ngo itere mpaga Mukura VS nubwo komisiyo ya FERWAFA ishinzwe amarushanwa yabyamaganiye kure ibinyujije mu kwanga ubujurire bwa Rayon Sports ku myanzuro yari yafashwe.
Komisiyo ishinzwe amarushanwa yavuze ko ibyabaye ari impanuka bitari kwirindwa na Mukura VS bityo umukino ukaba ugomba gusubirwamo kuri uyu wa Kabiri wa tariki 22 Mata 2025, kuri sitade mpuzamahanga ya Huye ndetse Mukura yo yamaze no kumenyesha abafana bayo ko amatike bari baguze mbere bazongera bakayinjiriraho abandi bakazamenyeshwa uko bazinjira.
