Ntagihindutse ! Evan Ferguson wa Brighton agomba gusohoka muri Mutarama
Umukinnyi ukomoka mu gihugu cya Ireland ukinira ikipe ya Brighton and Hove Albion, witwa Evan Ferguson, biravugwa ko ashobora gusohoka muri iyi kipe ikina Premier League muri iri soko ry’igura n’igurisha ry’abakinnyi ryo muri Mutarama /2025 .
Uyu musore w’imyaka 20 muri uyu mwaka w’imikino yagiye ahura n’ikibazo cyo kubura igihe gihagije cyo gukina ,kuko kugeza ubu amaze gukina iminota 368 gusa yose hamwe mu marushanwa yose iyi kipe yakinnye .
Evan Ferguson yabanje mu kibuga inshuro ebyiri gusa mu mikino ya Premier League kuva umutoza Fabian Hurzeler yatangazwa nk’umutoza mukuru w’iyi kipe asimbuye umutaliyani Roberto Di zerbi , ndetse atsinda igitego kimwe rukumbi mu mukino wahuje iyi kipe na Wolvermpton Wonderers mu Kwakira.
Uyu mukinnyi mpuzamahanga wa Irlande yakinnye imikino 36 mumarushanwa yose muri saison ishize ya Brighton,anatsinda ibitego bitandatu gusa .
Uyu musaruro w’uyu musore utari mwiza ahanini watewe n’imvune yo mu kaguru yari yaramubujije gukandagira mu mezi atanu, bituma ategereza kugeza muri Nzeri kugira ngo asubire mu kibuga muri iyi shampiyona.
Amakuru avuga ko Ferguson agomba gutizwa na ekipe ya Brighton kugirango ajye gushakisha iminota yo gukina kuko bijyanye n’ubusatirizi bwa Brighton burimo abarimo Danny Welbeck, Georginio Rutter na Joao Pedro bisa nkaho bitagishobotse kubona umwanya ubanzamo .
Nk’uko ikinyamakuru Independent kibitangaza ngo Fulham bahanganye muri Premier League iri mu makipe ari gushakisha uburyo bashobora kumutira Ferguson kugeza iyi shampiyona irangiye.
Ku ruhande rwa Marco Silva na Fulham ngo bizera ko bashobora guha Ferguson umwanya wo gukina kandi uhagije .