Ikipe ya Newcastle United yamaze kumvikana n’ikipe ya Nottingham Forest ku igurwa ry’umukinnyi w’umunya-Suwede Anthony Elanga ku kiguzi cya miliyoni £55.
Amakuru yizewe yatangajwe na BBC Sport yemeza ko iri gurwa rishobora kurangira mu cyumweru turimo.
Elanga, w’imyaka 23, yigaragaje cyane mu mwaka w’imikino wa 2024-2025 aho yatsinze ibitego bitandatu agatanga imipira 11 yavuyemo ibitego, atsinira ikipe ya Forest yari iyobowe na Nuno Espirito Santo.
Newcastle iri gushaka kongera imbaraga mu busatirizi bwayo mu gihe yitegura gusubira mu marushanwa ya Champions League, nyuma yo gusoza ku mwanya wa gatanu muri Premier League ishize.
Iyi ni yo transferi ya mbere Newcastle itanzeho amafaranga muri iki gihe cy’igura n’igurishwa ry’abakinnyi, kuko umukinnyi rukumbi yari imaze kwinjiza ari Antonio Cordero w’imyaka 18, waje ku buntu avuye muri Malaga.
Nottingham Forest yari yaraguze Elanga ku miliyoni £15 avuye muri Manchester United mu 2023. Uyu musore yageze muri Manchester United afite imyaka 12, aho yakiniye iyi kipe inshuro 55 mbere yo kwerekeza ku kibuga cya City Ground.
Impamvu Newcastle yashimishijwe na Elanga ni uko amaze kugaragaza impinduka zikomeye mu mukino we. Imibare yeyerekana ko ari umwe mu bakinnyi bahiga abandi mu bice bikomeye by’ubusatirizi.
