Mozambique : Abantu 21 bapfiriye mu myigaragambyo yakurikiye amatora ya Perezida
Minisitiri w’ubutegetsi bw’igihugu muri Mozambique yatangaje ko byibuze abantu 21 baguye mu mvururu kuva urukiko rukuru rwa Mozambique rwakemeza ko ishyaka riri ku butegetsi ryitwa Frelimo ryatsinze amatora atavugwaho rumwe kugeza ubu .
Iyi Minisiteri yemeza ko abapfuye barimo nibura abapolisi babiri, nk’uko Minisitiri wayo witwa Pascoal Ronda yabitangarije mu kiganiro n’abanyamakuru ku mugoroba wo ku wa kabiri.
Minisitiri Pascoal yahamije ko kuva ku wa mbere habaruwe nibura ibikorwa 236 by’ihohoterwa rikomeye muri iki gihugu aho byibuze abantu 25 bakomeretse, barimo abapolisi 13.
Imyigaragambyo yatangiye nyuma yuko Frelimo yemejwe ko yatsinze amatora. Ibi bihita bikurikirwa nuko abigaragambyaga n’imitwe itavuga rumwe n’ubutegetsi bahise birara mu mihande bavuga ko amajwi yo ku ya 9 Ukwakira yaba yaribwe .
Kugeza ubu abantu 78 ni bo batawe muri yombi kandi ingamba z’umutekano zamaze gukazwa mu gihugu hose, nk’uko Ronda yabitangarije televiziyo y’igihugu izwi nka TVM.
Aho yagize ati: “Ingabo zongerewe umubare wazo mu duce turi kubarizwamo imyagaragambyo ikomeye “.
Frelimo yashinjwe inshuro nyinshi n’abatavuga rumwe n’ubutegetsi n’indorerezi z’amatora kuba yiba amajwi nubwo yo ibicishije mu buyobozi bwayo yahakanye ibyo aregwa.
Mozambique yaranzwe n’imyigaragambyo ikaze kuva mu mpera z’Ukwakira ubwo abayobozi b’amatora batangazaga ko Chapo w’imyaka 47 yatsinze amatora ya perezida.
Kuva ku ya 21 Ukwakira hapfuye abantu barenga 130, nk’uko bitangazwa n’imiryango mpuzamahanga yita ku burenganzira bwa muntu ndetse n’imiryango itegamiye kuri Leta yashinje kandi inzego z’umutekano za Mozambike gukoresha imbaraga z’umurengera mu basivile kugira ngo bahoshe imyigaragambyo.