Mohamed Salah yongeye kumanika agati ahatazapfa kugezwe ukuboko na buri Munya-Africa wese muri rugo!
Umunya-Misiri akaba na rutahizamu w’ikipe ya Liverpool Mohamed Salah yabaye umukinnyi wa mbere w’umunya Africa umaze gutsinda ibitego byinshi mu mikino ya UEFA Champions League nyuma yo kuzuza ibitego 45.
Hari mu mukino wa kabiri w’imikino y’Iburayi ya UEFA Champions League wa huzaga ikipe ya Liverpool y’umutoza Arne Slot ndetse n’ikipe ya Bologna y’umutoza Vincenzo Italiano umukino wabereye Anfield ku kibuga kikipe ya Liverpool aho uyu Munya-Misiri yayitsindiye igitego cya kabiri ku munota wa 75’ ku mupira yari yahawe n’umunya- Hungary Dominik Szoboszlai bituma yuzuza igitego cya 45 muri ruhago ye mu mikino ya UEFA Champions League ahita afata n’umwanya wa mbere mu Banya-Africa bamaze gutsinda ibitego byinshi muri iri rushanwa.
Mohamed Salah yaherukaga gutsinda igitego muri iyi mikino mu mwaka wa 2023 mu mukino ubanza bari bakinnye mo na Real Madrid ikabanyagira ibitego bitanu kuri bibiri(5-2) icyo gihe akaba yari yagitsinze ku munota wa 14’ cyasangaga icya Darwin Núñez cyo ku munota wa 4’ byatumye ahita anganya na Didier Drogba n’ibitego 44.
Uyu rutahizamu wa Liverpool w’imyaka 32 yayigezemo mu mwaka wa 2017 avuye mu ikipe ya AS Roma mu gihugu cy’ubutaliyani nyuma yo kuyikinira imikino 65 akayitsindiri ibitego 20, mu gihe ubu amaze gukinira ikipe ya Liverpool imikino 256 akaba amaze kuyinjiriza ibitego 159 utibagiwe ibikombe bikomeye yayihaye harimo UEFA Champions League ya 2018/19 ndetse na Pemier League ya 2019/20.
Ikipe ya Liverpool umukino yatsindaga wa Bologna byatumye yuzuza amanota atandatu kuri atandatu muri UEFA Champions League ivuguruye ya 2024-2025, ubu ku rutonde rusange ikaba iri ku mwanya wa gatanu.
Ni mu gihe ku rutonde rw’abakinnyi b’abanya Africa bamaze gutsinda ibitego byinshi kuruta abandi muri UEFA Champions League usibye Mohamed Salah uruyoboye n’ibitego 45 , akurikirwa na Didier Drogba n’ibitego 44,Umunya-Cameroon Samuel Eto’o n’ibitego 30,Umunya-Senegal Sadio Mane n’ibitego 27, ndetse n’Umunya-Algeria Riyad Mahrez we umaze gutsinda ibitego 20.