Miss Nshuti Muheto Divine yasabiwe gufungwa umwaka n’amezi 8
Ubushinjacyaha bwasabiye Miss Nshuti Muheto Divine igifungo cy’umwaka n’amezi 8, n’ihazabu y’amafaranga ibihumbi 220frw aramutse ahamwe n’ibyaha ashinjwa byose.
Kuri uyu wa kane mu masaha ya saa tatu za mugitondo, Ku rukiko rw’ibanze rwa Kicukiro mu mugi w’Akigali , habereye iburanishwa ku rubanza ruregwamo miss Nshuti Muheto Divine wabaye Nyampinga w’u Rwanda wa 2022.
Uyu ukekwaho ibyaha birimo gutwara ikinyabiziga nta ruhushya rw’aburundu afite, gutwara yanyoye ibisindisha ndetse no guhunga inzego z’umutekano ubushinjacyaha bwasabiye uyu mwari , igifungo kingana n’umwaka n’amezi umunani ndetse n’ihazabu y’amafaranga ibihumbi 220 y’Amanyarwanda.
Muri uru rubanza, abunganira Muheto Divine mu mategeko, basobanura ko Ku cyaha cyo gutwara ikinyabiziga nta ruhushya ko mubyukuri ubushinjacyaha butakacyise icyaha, kuko ngo uyu mwari yari afite uruhushya rw’agateganyo ruzwi nka Provisoire, bityo ngo bikaba byakiswe amakosa.
Ubusanzwe mu mategeko agenga umuhanda, bavuga ko umuntu ufite uruhushya rw’agateganyo yemererwa gutwara ikinyabiziga igihe Ari kumwe n’umuntu ufite uruhushya rwa burundu. Aha rero ubushinjacyaha buvuga ko ntacyo kwireguza afite.
Abunganizi ba Muheto Kandi, mu gusobanura ku cyaha ashinjwa cyo gutwara, bavuze ko uyu mwari afite imyaka mike, bityo akaba ariyo mpamvu yatumye ashamadukira gutwara ikinyabiziga nta ruhushya afite.
Mu gihe ubushinjacyaha bwo buvuga ko kuba ari hejuru y’imyaka 18, ifatwa nk’ikigero fatizo cy’ubukure mu Rwanda, ntacyo akwiye kwireguza mbese ko ngo yagombaga kubahiriza amategeko nk’abandi bose.
Miss Nshuti Muheto Divine wasabiwe gufungwa umwaka n’amezi 8 ati ” Ndemera icyaha cyo gutwara nasinze , gutwara ntaruhushya no kugonga ariko sinemera guhunga.”