Manchester United yasabiye abakinnyi bayo rifuti mu ndege ya Manchester city ihabwa urwamenyo
Ikipe ya Manchester United yasabye Manchester City ko yaha rifuti mu ndege abakinnyi bayo Alejandro Garnacho ndetse na Kobbie Mainoo mu rugendo rwerekeza mu gihugu cy’Ubufaransa mu bihembo bya Ballon d’or biteganyijwe gutangwa kuri uyu wa mbere.
Mu muvuno mushya wa Sir James Arthur Ratcliffe wo kugabanya amafaranga ikipe ya Manchester United isohora ku mwaka hagamijwe kuzubaka sitade nshya ndetse no kuvugurura ikibuga k’imyitozo cya Manchester United, hatangiye inkundura yo gukuraho ibintu bimwe na bimwe byatwaraga amafaranga iyi kipe.
Ibi biri mu byihishe inyuma yo kuba ikipe ya Mnachester United yasabiye Rifuti mu ndege abakinnyi bayo babiri bazajya mu birori bya Ballon d’or bizatangwa kuri uyu wa mbere tariki 28 Ukwakira 2024 mu nyubako ya Théâtre du Châtelet mu Bufaransa nk’uko bisanzwe.
Ubundi ikipe ya Manchester United ifite abakinnyi babiri gusa muri ibi bihembo aribo Alejandro Garnacho ndetse na Kobbie Mainoo bose baherereye mu kiciro cy’abakinnyi bakiri bato bitwaye neza “Kopa Trophy” ibi bikaba byatumye banga gushyirwa mu ndege yabo yari kugendaho byinshi kandi ari bake bahitamo gusaba ikipe ya Manchester city ngo ibatware(ibahe rifuti).
Ikipe ya Manchester City yo ifite abakinnyi bakabaka mu 8, muri ibi bihembo bya Ballon d’or ya 2023-2024, byanatumye inanga ubusabe bwa United bwo kuzaha rifuti Alejandro Garnacho ndetse na Kobbie Mainoo.
Bagize bati “indege yacu izaba yuzuye “
Manchester United iherutse kandi gutandukana na Sir Alexander Ferguson nk’uwari uhagarariye iyi kipe hirya no hino ku si (Global Ambassador) mu rwego rwo kugabanya umubare w’amafaranga iyi kipe itakaza buri mwaka, byaje bikurikira abakozi barenga 200 iyi kipe yarekuye ivuga ko ntacyo bakora kigaragara kandi bahembwa.