Liverpool yinjiye mu rugamba ihanganiyemo umukinnyi na Manchester city
Mu ikipe ya Liverpool, humvikanye amakuru aganisha ku ishakisha ry’umusimbura wa Trent Alexander Arnold, biteganyijwe ko agomba gusohoka muri iyi kipe mu mpeshyi y’uyu mwaka, myugariro w’iburyo Andrea Cambiaso, ukinira ikipe ya Juventus ari mu b’imbere bahabwa amahirwe.
Mu gihe kontaro ye igana ku musozo biravugwa ko umukinnyi Trent Alexander Arnold, yamaze kumvikana n’ikipe ya Real Madrid, nayo yamaze kumwemerera umushahara wisumbuyeho kuwo yabonaga mu Bwongereza.
Kugenda kw’uyu mugabo bishobora kuza gusiga icyuho gikomeye cyane mu ikipe ya Liverpool, dore ko ari mu bakinnyi batanu bari basigaye mu ikipe yatwaye igikombe cya shampiyona umwaka w’imikino 2019-2020.
Nubwo bivugwa ko umutoza Arne Slot,usanzwe atoza ikipe ya Liverpool, amaze igihe kinini yifuza kugura myugariro Jeremy Frimpong wa Bayer Leverkusen, ikinyamakuru Gazzetta dello sport kirashyira mu majwi Umutaliyani Cambiaso ko ari we mukandida mwiza ushobora gusimbura Trent Alexander.
Cambiaso usanzwe ari myugariro w’ibumoso yifujwe bidasanzwe n’ikipe ya Manchester city, mu isoko ryo muri Mutarama ubwo iyi kipe yariho ishakisha umusimbura wa Kyle Walker, wari umaze kwerekeza mu ikipe ya AC Milan, nk’intizanyo ndetse biravugwa ko iyi kipe itozwa na Pep Guardiola,ishobora kuba itarava ku izima mu bijyanye no kuba yazana uyu mugabo mu majyaruguru ashyira uburengerazuba bw’Ubwongereza.
Ikipe ya Juventus iri mu mazi abira aho igomba kuza kurekura umwe mu bayikinira dore ko kugenda gutungurqnye kwa Thiago Motta, byateye ibibazo by’amikoro bitari byitezwe.
Andrea Cambiaso rero nk’umukinnyi ufite urwego rugenda ruzamuka kandi akaba ari mu bifuzwa n’amakipe menshi atandukanye, bihita byumvikana ko nta kabuza ari mu bagomba kuza kurekurwa n’iyi kipe mu gihe yahabwa agatubutse.
Manchester city nyuma yaho itangiye miliyoni 65, z’amapawundi mu isoko riheruka biravugwa ko igiciro cyo kugura uyu mugabo cyageze kuri miliyoni 60 z’amapawundi, mu gihe asigaje imyaka ine ku masezerano y’umurimo ye.
Birumvikana ko icyo giciro kidakanganye ku ikipe ya Liverpool, gusa ikaba ishobora kuza kugongwa nuko ikeneye myugariro mushya ndetse na rutahizamu mushya bose bakenewe n’iyi kipe.
Umwana muto Conor Bradley, wazamutse aturutse mu makipe y’abato ya Liverpool, yagiye yigaragaza neza muri uyu mwaka w’imikino aho amaze gukina imikino 22, mu marushanwa yose, ndetse birashoboka cyane ko yahita aba umusimbura w’ako kanya wa Alexander Arnold, mu gihe iyi kipe yaba itagiye ku isoko muri iyi mpeshyi.