Liverpool yateye utwatsi miliyoni 20 Real Madrid iri gutanga kuri Alexander Arnold
Ikipe ya Liverpool biravugwa ko yamaze kwanga amafaranga angana miliyoni 20 z’amayero ikipe ya Real Madrid iri kuyiha kugirango itware myugariro wayo ukina ku mpande witwa Trent Alexander Arnold muri iri soko ry’igura n’igurisha ry’abakinnyi ryo muri uku kwezi kwa mbere .
Ikipe ya Real Madrid mbere na mbere yabanje kugirana ibiginiro n’umukinnyi ku gite cye na Trent nubwo itari yagatanze ubusabe ku ikipe ya Liverpool bwerekana ko ishaka kuyigurira umukinnyi muri uku kwa mbere .
Kuri uyu wa gatanu , bivugwa ko ari bwo ikipe ya Liverpool yakuriye inzira ku murima ikipe ya Real Madrid ko itakemera miliyoni 20 zari zikubiye mu busabe iyi kipe yari yayihaye ku munsi wejo .
Binavugwa ko Real Madrid ifite andi mahitamo yuko ishobora kuzategereza uyu musore w’imyaka 26 mu mpera za Kamena bakaba ari bwo bamuzana ku buntu ubwo amasezerano ye azaba arangiye .
Nubwo bashobora kubona uyu mukinnyi w’Umwongereza ku buntu mu mpeshyi ariko umutoza wa Madrid, Carlo Ancelotti, yifuza cyane kumusinyisha muri uku kwezi nyuma y’imvune yarangije shampiyona y’umukinnyi w’iburyo wayo Dani Carvajal kandi binagaragara ko hakiri icyuho gikomeye ku mwanya we .
Kurundi ruhande ariko Amakuru aturuka muri Liverpool ashimangira ko Alexander-Arnold winjiye muri Liverpool afite imyaka itandatu, nta kimenyetso yatanze cyerekana ko ashaka kuva muri iyi kipe.