Liverpool yagaruye umukinnyi wayo w’ingenzi mbere yo gukina na Real Madrid
Myugariro w’ikipe ya Liverpool Umwongereza Trent Alexander-Arnold amahirwe ni menshi ko azagaragara ku mukino ikipe ya Liverpool izakiramo Real Madrid nyuma y’ibibazo by’imvune uyu musore yari yagize.
Uyu musore ukina nka myugariro w’iburyo yari yagiriye ikibazo cy’imvune ku mukino ikipe ya Liverpool yari yatsinzemo Aston Villa ibitego bibiri ku busa(2-0) mbere gato y’akaruhuko mpuzamahanga(International Break).
Ibi byateye impungenge ko atazaboneka ku mikino ibiri Liverpool yari ifite imbere ukuyeho uwa Southampton F.C. wavuga ko utari ukomeye nubwo wabagoye , ahubwo umukino wa Real Madrid nuwa Manchester City muri Premier League n’iyo yari ihangayikishije.
Gusa kuri uyu wa kabiri wa tariki ya 26 Ugushyingo 2024, mu myitoza yakorewe ku kibuga k’imyitoza cya Liverpool ” AXA Training Centre” uyu Mwongereza yakoranye n’abandi imyitozo hitegurwa umukino wa Real Madrid bitanga ikizere kinini cyo kuzamubona ku mukino .
Ikipe ya Liverpool y’umutoza Arne Slot n’iyo iyoboye urutonde rwa UEFA Champions League ya 2024-2025 na amanota 12 kuri 12 aho mu mikino ine ntanumwe iratakaza ikaba imaze kwinjiza ibitego 10 yinjizwa igitego 1 ikaba izigamye 9.
Mu gihe urebye umusaruro wa Slot muri Premier League usanga naho ari ntamakemwa aho amaze gutakaza umukino umwe wonyine , ukaba umukino batsinzwe na Nottingham Forest kuri Anfield.
Iyi Real Madrid izahura na Liverpool ku munsi w’ejo wa tariki ya 27 Ugushyingo 2024, ifite imvune z’abakinnyi benshi barimo Dani Carvajal, David Alaba, Éder Militão, Lucas Vázquez, Aurélien Tchouaméni, Rodrygo Silva de Goes, ndetse na Vinicius Junior.