Liverpool yafunguye ibiganiro byo gutera gapapu Arsenal
Biravugwa ko ikipe ya Liverpool, yamaze gufungura ibiganiro na rutahizamu Alexander Isak, ukinira ikipe ya Newcastle aho ishaka gutera gapapu mukeba wayo Arsenal.
Alexander Isak, ari muri ba rutahizamu bahagaze neza muri uyu mwaka w’imikino, aho amaze gutsinda ibitego 23, mu marushanwa yose ndetse akaba aherutse gufasha ikipe ye ya Newcastle, gutwara igikombe cya mbere gikomeye mu myaka 56 yari ishize ubwo batsindaga ikipe ya Liverpool.
Kwifuza Alexander Isak, kwa Liverpool, si ibya vuba, dore ko na mbere y’uko abatsinda igitego gishimangira intsinzi kuri iki cyumweru,iyi kipe itahwemaga kwerekana ko yifuza cyane uyu munya-Suwede.
Isak wazamutse mu makipe y’abato agereranywa na rutahizamu Ibrahimovic w’iwabo, dore ko bose barerewe mu ikipe yo mu murwa mukuru w’igihugu cya Suwede,Stockholm yitwa AIK, ari kwifuzwa cyane n’amakipe atandukanye arimo n’ikipe ya Arsenal yo yamaze kumugira uw’ingenzi mu isoko ry’igura n’igurishwa ryo muri iyi mpeshyi iza.
Gusa nubwo bimeze bityo, amakuru atangazwa n’umunyamakuru Fabrizio Romano wo mu Butaliyani, avuga ko ikipe ya Liverpool, yaba yaramaze kuganira n’abahagarariye inyungu z’uyu mukinnyi, ibintu ashingiraho avuga ko bitazorohera buri umwe kumukura muri Newcastle ku giciro gito.
Usibye Erling Braut Haaland, ufite 21 na Mohamed Salah, ufite 27 nta wundi rutahizamu wigeze atsinda ibitego byinshi kurusha uyu musore dore ko ubu amaze gutsinda ibitego 19 muri shampiyona.
Bitewe n’ingamba z’ubukungu zafashwe ku mugabane w’Uburayi biragaragara ko kugura uyu mugabo bizagora amakipe menshi harimo n’ayo mu Bwongereza. Magingo aya ikipe iherutse guca agahigo n’ikipe ya Chelsea yatanze miliyoni 115 z’amapawundi igura Moise Caicedo, ni mugihe kandi ikipe ya Liverpool yo, yatangaga miliyoni 111 z’amapawundi ariko bikarangira imucapujwe.
Ikipe ya Liverpool, iherutse kugaragaza ko ishaka kugura umukinnyi uhenze ndetse birashoboka cyane ko yatanga agera muri miliyoni 150 z’amapawundi kuri uyu munya-Suwede ukomoka ufite inkomoko muri gihugu cya Eritereya.
Biravugwa ko mu gukusanya amafaranga menshi no kwirinda ibihano Liverpool, igomba kuza kwemera igatandukana na rutahizamu wayo Darwin Nunez, uherutse kuvugwaho ibyo kwerekeza mu gihugu cya Arabia Sawudite, aho uyu mugabo ukomoka mu gihugu cya Uruguay yageze mu ikipe ya Liverpool, aturutse muri Benfica nyuma yokugira umwaka mwiza w’imikino wa (2021/2022) ubwo yatsindaga ibitego 34 mu mikino 41 yonyine.
Ikipe ya Liverpool, yari yazanye uyu mugabo kuri miliyoni 85 z’amapawundi gusa kubera ibibazo by’imvune no kudahozaho mu gutsinda umutoza Arne Slot, amaze igihe abanza Diogo Jota, mu gihe ameze neza ndetse rimwe na rimwe agakinisha Luis Diaz, usanzwe aca ku ruhande.
Mu mikino 29, ya shampiyona y’Abongereza, imaze gukinwa Darwin Nunez, yashoboye kubanzamo 8 gusa ndetse akaba amaze gutsinda ibitego 7, mu marushanwa yose. Ibintu byaje gukomeza kuba bibi cyane dore ko uyu mugabo nmariwe uherutse kurata penaliti ubwo ikipe ye yakurwagamo na Paris Saint Germain, yo mu Bufaransa mu mikino ya (UEFA champions league).