Leta zunze z’Amerika :Trump yaciye amarenga ko atazongera kwiyamamaza natsindwa amatora
Donald Trump wahoze ari Perezida w’Amerika yavuze ko adateganya kongera kwiyamamaza mu mwaka wa 2028 naramuka atsinzwe mu matora ya perezida yo mu Gushyingo uyu mwaka.
Nubwo Amategeko y’Amerika abuza abaperezida gutegeka manda zirenze ebyiri, rero Trump ntiyitezwe kongera kwiyamamaza mu mwaka wa 2028, n’iyo yaramuka atsinze amatora yo muri uyu mwaka wa 2024.
Mu kiganiro n’igitangazamakuru Sinclair Media Group, yabajijwe niba ateganya kongera kwiyamamaza igihe yaba atsinzwe na Visi Perezida Kamala Harris, umukandida w’ishyaka ry’abademokarate.
Trump yagize ati: “Oya, simbiteganya. Ndatekereza…ko bizaba birangiye.” “Ibyo [kongera kwiyamamaza] simbibona na gato.”Ariko yongeyeho ko “twizeye ko tuzatsinda cyane”.
Ayo magambo yamaganwe n’itsinda rishinzwe ibikorwa byo kwamamaza Harris hamwe na komite idafite ishyaka ibogamiyeho y’Abayahudi b’Abanyamerika, ndetse n’umuryango wo muri Amerika urwanya isebanya (Anti-Defamation League).
Kwemera kwa Trump ko ashobora gutsindwa gushobora kuba kugaragaza ukuntu amahirwe y’ishyaka ry’abademokarate yahindutse kuva Harris yaba umukandida waryo, nyuma y’icyemezo cya Perezida Joe Biden cyo kwikura mu ihatana.
Itsinda rishinzwe ibikorwa byo kwamamaza Harris ryakusanyije miliyoni zirenga 190 z’amadolari (angana na miliyari 256 Frw) muri Kanama (8), ugereranyije na miliyoni 130 z’amadolari (angana na miliyari 175 Frw) yakusanyijwe n’itsinda ry’ibikorwa byo kwamamaza Trump n’imiryango ifatanya na ryo.
Mu mpuzandengo (imibare rusange) y’amakusanyabitekerezo yo ku rwego rw’igihugu akurikiranwa na BBC, Harris ari imbere ya Trump, ndetse ikusanyabitekerezo ryasohowe ku cyumweru n’igitangazamakuru CBS rigaragaza ko ku rwego rw’igihugu Harris ari imbere ya Trump ku manota 52% kuri 48%.
Muri leta z’ingenzi z’urugamba cyangwa z’isibaniro (zizwi nka ‘battleground states’), zigaragara ko zizaba kamarampaka ku majwi rusange, Harris ari imbere gato ya Trump na 51% kuri 49%. Iyo ni intambwe ntoya yateye ugereranyije n’ikusanyabitekerezo nk’iryo ryakozwe mu kwezi gushize na CBS, igitangazamakuru gikorana na BBC muri Amerika, ubwo bombi baguye miswi kuri 50%.
Irindi kusanyabitekerezo ryasohowe ku cyumweru n’igitangazamakuru NBC rigaragaza ko Harris arusha Trump amanota 5% muri Amerika hose.
Iryo kusanyabitekerezo ryanasanze 48% by’abatora biyandikishije babona neza (biyumvamo) Harris ugereranyije na 32% bamubonaga neza muri Nyakanga (7) – iyo ni yo nyongera ya mbere nini cyane ibayeho muri urwo rwego kuva mu gihe cy’uwari Perezida w’Amerika George W Bush, wabonwe neza cyane nyuma y’ibitero byo ku itariki ya 11 Nzeri (9) mu mwaka wa 2001.
Ariko cyo kimwe no ku yandi makusanyabitekerezo, iryo kusanyabitekerezo cya NBC ryagaragaje ko Trump afite akarusho kagaragara mu batora ku bijyanye na zimwe mu ngingo zikomeye cyane zo muri aya matora, harimo nk’ubukungu, ikiguzi cy’imibereho n’abimukira.
BBC yasabye itsinda rishinzwe ibikorwa byo kwamamaza Trump kugira icyo rivuga kuri iyi mibare yo mu makusanyabitekerezo. Kugeza ubu nta cyo rirasubiza.
Mu gihe cyashize, uyu muherwe ufite imari mu rwego rw’ubwubatsi ni gacye cyane yemeye ko bishoboka ko yatsindwa amatora, akenshi yagiye atera akanyabugabo abamushyigikiye akoresheje imbwirwaruhame n’ubutumwa bwo ku mbuga nkoranyambaga asezeranya intsinzi mu matora.Ariko iyi ibaye inshuro ya kabiri mu minsi ine akomoje ku kuba bishoboka ko yatsindwa.
Trump, w’imyaka 78, amaze kuba umukandida perezida w’ishyaka ry’abarepubulikani mu matora atatu ya perezida yikurikiranya, ndetse yahinduye iryo shyaka cyane mu myaka umunani ishize.