Kigali : Hatangajwe ibyakozwe mu kuzamura musaruro w’inganda zitunganya ibikomoka ku buhinzi n’ubworozi
Minisitiri w’Intebe Dr Edouard Ngirente, yagaragaje ibyakozwe na Guverinoma kugira ngo umusaruro w’inganda zitunganya ibikomoka ku buhinzi n’ubworozi wiyongere muri NST1.
Ngirente yemeje ko umusaruro w’inganda zikora imyenda n’ibikomoka ku mpu wikubye inshuro eshanu mu myaka irindwi ishize.
Aho wavuye kuri miliyari 34Frw mu 2017, ubwo hatangiraga NST1, ugera kuri miliyari 154Frw mu mwaka ushize wa 2024. Ni mu gihe umusaruro w’inganda muri rusange wikubye inshuro eshatu kuko mu 2017 wari miliyari 222Frw, ugera kuri miliyari 599Frw mu 2024.
Minisitiri w’Intebe Dr Edouard Ngirente, yanavuze ko agaciro ka Kawa ku Isoko Mpuzamahanga kari gahagaze neza, bituma umusaruro wayo wiyongera n’ubwo ubwinshi bwayo bwari bwakomwe mu nkokora n’ubwinshi bw’ibiti bishaje.
Dr. Ngirente kandi yanabwiye inteko inshinga amategko ko mu mwaka ushize wa 2024, Abanyarwanda bakora mu rwego rw’inganda bari ibihumbi 259 bavuye ku bihumbi 180 babarurwaga mu 2017.
Uretse gutanga akazi, inganda zinjiza amafaranga menshi mu misoro, kuko mu mwaka w’ingengo y’imari wa 2023/24, zinjije miliyari 459Frw.
Kuri ubu ,umusaruro w’ibyoherezwa mu mahanga ukomeje kwiyongera kuva ugereranyije umwaka wa 2017, ubwo hatangiraga NST1 na 2024.
Iyi ni ishusho y’ibyo u Rwanda rwohereza mu mahanga ku mwaka, hagendewe ku madovize byinjiza: Icyayi cyavuye kuri miliyoni $88 kigera kuri miliyoni $114 , Ikawa yavuye kuri miliyoni $69 igera miliyoni $79 , Ibireti byavuye kuri miliyoni $3 bigera kuri miliyoni $8 , Imboga zavuye kuri miliyoni 12 zigera kuri miliyoni $20 , Imbuto zavuye kuri miliyoni $7 zigera kuri miliyoni $30 , Indabo zavuye kuri miliyoni $4 zigera kuri miliyoni $2 .