Rutahizamu w’Umunya-Colombia Jhon Duran yamaze kwerekeza muri Fenerbahce yo muri Turikiya ku masezerano y’intizanyo y’umwaka umwe, nyuma y’amezi atandatu gusa avuye muri Aston Villa yerekeza muri Al-Nassr yo muri Saudi Arabia ku giciro cya miliyoni £71.
Duran w’imyaka 21 yatsindiye Aston Villa ibitego 12 mu mikino 29 yayikiniye mu mwaka ushize, mbere yo kwerekeza muri Al-Nassr muri Mutarama aho yahise agaragaza ubuhanga bwe atsinda ibitego 12 mu mikino 18.
Duran yageze muri Aston Villa muri Mutarama 2023 avuye muri Chicago Fire ku giciro cya miliyoni £18.
Yakiniye iyo kipe imikino 78 atsinda ibitego 20, nubwo akenshi yabanaga n’imbogamizi zo kutabona umwanya uhagije kubera imibare Ollie Watkins yari arimo gukora icyo gihe .
Uyu musore afite ibitego 3 mu mikino 17 yakiniye ikipe y’igihugu ya Colombia. Ku rundi ruhande, Al-Nassr yasoje shampiyona y’Abarabu ku mwanya wa gatatu, mu gihe Cristiano Ronaldo, we, aheruka kongera amasezerano y’imyaka ibiri muri iyo kipe.
Fenerbahce iyobowe n’umutoza Jose Mourinho, yasoreje ku mwanya wa kabiri muri shampiyona y’u Buyuturuki.
