Intsinzi y’amateka Amorim wa Man Utd aherutse gukorera kuri Guardiola yasize iki?
Ruben Amorim witegura kuza i Manchester gutangira akazi ku wa kabiri yafashije ikipe atoza ya Sporting CP mu ntsinzi ya 4-1 babonye ku ikipe ya Manchester City ubwo hakinwaga umunsi wa 4 wa UEFA champions league.
Nubwo haba hari abagishidikanya ku bushobozi bwa Ruben Amorim, intsinzi ya Sporting CP itsinda Manchester city yakabaye ibubakamo ikizere dore ko yatsinze umwe mu batoza beza bahari ku isi.
Ikipe ya Manchester City yatsinzwe iri mu bihe bikomeye cyane dore ko, itorohewe n’imvune ziyugarije nyuma y’ivunika rya Rodri wari uje akurikira kizigenza De Bruyne ibihe umukinnyi wayo Bernardo Silva yise iby’umwijima.
Abenshi mu basesengura bavuga ko ibintu bigiye kurushaho kuba bibi dore ko ari bwo bwa mbere mu myaka itanu, ikipe ya Manchester City itakaje imikino itatu yikurikiranya, abasesengura bakomeza bavuga ko, kuza kwa Ruben Amorim mu baturanyi bigiye guhurirana n’ibi bihe iyi kipe irimo ibintu bavuga ko bishobora kutazorohera umutoza Guardiola.
Intsinzwi yo ku ya 5 Ugushyingo yasize yishe byinshi mu majyaruguru dore ko, ikipe ya Manchester City itari yarigeze yinjizwa igitego na kimwe mu mikino itatu ibanza muri champions league uyu mwaka ndetse bikaba byari ubwa mbere yari itakaje umukino mu gihe giteganywa cy’iminota 90 nyuma yo gutsindwa n’ikipe ya Real Madrid muri 2022 ubwo bahuriraga muri kimwe cya kabiri cya UEFA champions league, bwari ubwa mbere kandi, iyi kipe itsinzwe ibitego bine dore ko, byaherukaga mu mwaka wa mbere w’imikino Guardiola ahagera ubwo batsindwaga n’ikipe ya Barcelona.
Abenshi batekerezaga ko Manchester City yatsindwa gusa ntibatekerezaga ko yatsindwa yandagajwe gutya
Umunya- Esipanye Josep Guardiola utoza ikipe ya Manchester city ari mu ihurizo rikomeye
Umutoza Amorim araza gusiga ikipe ya Sporting CP mu myanya umunani ya mbere, ibintu bihagije kugira ngo iyi kipe yisange mu mikino ya nyuma ya champions league araza kandi gusiga ikipe ye, iyoboye urutonde rwa shampiyona ya Portugal nyuma yo gutsinda ibitego 35 ikinjizwa 4 mu mikino 10 yakinnye.
Birashoboka cyane ko intsinzi ziraza kwiyongera zikagera kuri 11 dore ko iyi kipe iteganya gusezera ku mutoza wayo Amorim mu mukino izakina n’ikipe ya Braga ku wa 10 Ugushyingo.
Gutsinda ikipe ya Manchester City n’imwe mu mikino izandikwa mu bitabo nyuma y’uko abikoze mbere yo gusezera dore ko, ku wa mbere w’iki cyumweru yari yatangaje ko, kubona intsinzi imbere ya Guardiola biri mu byari gutuma abafana b’ikipe ya Manchester United agiye kwerekezamo bongera ikizere bari bamufitiye.