Impamvu eshanu zigomba gutuma ureba ‘Premier League’ y’Abongereza muri iyi week-end
Shampiyona y’Abongereza ifatwa nk’iza mu myanya ya mbere mu zikunzwe cyane i Burayi, dore ko usanga imikino yayo igaragaramo ihangana rikomeye cyane, ibintu abenshi bahuza n’uko yisanisha n’umuco wabo.
Uyu munsi Daily–Box yaguteguriye impamvu eshanu zigomba kuza gusembura abakunzi ba ruhago maze bagatera agatebe berekeje amaso kuri iyo mikino.
1. Abakeba bo hambere baraba bongera gucakirana
Ikipe ya Nottingham Forest iraza kwakira Ipswich Town ku kibuga City Ground aho igomba kuba isabwa amanota y’igiteranyo bitaba ibyo igakomeza kumanuka mu mwobo aho ishobora kwisanga ntawe uyiha umugozi ngo igaruke mu buzima.
2. Ikibuga Selhurst Park niryo sibaniro ry’urugamba Palace yakiramo Newcastle United
Ni umwe mu mikino itandatu iteganyijwe ku munsi wo kuwa Gatandatu, aho ikipe ya Crystal Palace iraba yakiriye Newcastle United. kagoma(Eagles) nkuko Crystal palace bakunda kuyita iraba yakira (Magpies) za Newcastle United izina rikunze kwitwa utunyoni tw’incabwenge tuzwi nka gasuku, bose intumbero n’imwe, n’amanota atatu, kandi uza kuyegukana afite amahirwe menshi yo kwinjirana akanyamuneza mu kwezi gushya.
3. West Ham United (The Hammers) baraba Batana mu mitwe n’Abarashi b’i London (Gunners)
Intangiriro za shampiyona z’ikipe ya Westham United, ntiziri kugenda neza ndetse byitezwe ko ibihe bibi iyi kipe irimo bishobora kuza gukomeza ubwo iraba isurwa n’ikipe ya Arsenal ku kibuga (London Stadium), umukino biteganyijwe ko ariwo upfundikira indi yose iraza gukinwa ku wa Gatandatu. Abenshi baremeza ko ikipe ya Arsenal iraba ishaka amanota atatu imbumbe dore ko ishaka kugaruka mu rugamba rwo guhatanira igikombe cya shampiyona.
4. Ruben Amorim, arakira umukino we wa mbere wa shampiyona ku kibuga ‘Old Trafford‘
Umutoza mushya w’ikipe ya Manchester United Ruben Amorim araza gutoza umukino we wa mbere wa shampiyona mu rugo ubwo araba yakira ikipe ya Everton ku Cyumweru. Igihe ntikiragera ku buryo wakwitega byinshi ku mutoza Amorim, gusa birasiga isomo mu gihe yabura amanota ku ikipe nka Everton mu rugo.
5. Liverpool, Manchester City : kurya ni kare !
Uwavuze ijambo,” kurya ni kare”, yarazi icyo asobanura, amashyushyu ni menshi ku bakunzi ba ruhago dore ko imikino nk’iyi igaragara gake, ku kibuga Anfield ikipe ya Liverpool ibarizwa mu rusisiro rwa Marseyside iraba yakira Manchester City y’umutoza Guardiola, nubwo umusaruro w’amakipe yombi umeze nk’imbusane mu kigereranyo ntibibuza ko habaho gutungurana ku ikipe ya Manchester City, imaze igihe ititwara neza dore ko niramuka itsinzwe cg ikanganya uza kuba ubaye umukino wa Karindwi wikurikiranya itabona intsinzi.
Liverpool ya mbere ku rutonde iri mu rugamba rwo gutwara igikombe cya Shampiyona iheruka gutwara mu 2020 ubwo kwishima bitari byemewe bitewe n’icyorezo cya COVID-19 cyayogozaga isi muri iyo myaka.Birashoboka cyane ko Manchester City ya Gatatu ku rutonde magingo aya yaza kwinyara mu isunzu maze igatangira kureba uburyo yakwisubiza igikombe ifite aho yaba iciye agahigo ko kucyegukana inshuro Eshanu yikurikiranya, ibintu bitari byakorwa n’indi kipe iyo ariyo yose.