Ikipe ya Bournemouth yabonye intsinzi y’amateka kuri Manchester city
Umunya-Ghana Antoine Semenyo n’umunya-Brazil Evanilson bafashije ikipe ya Bournemouth kubona intsinzi ya mbere mu mateka ku ikipe ya Manchester City yugarijwe n’ibibazo by’imvune
Bournemouth yari yakiriye umukino, iri mu bihe byayo byiza dore ko, ibonye intsinzi ya gatatu yikurikiranya nyuma y’aho iherukira gutsinda ikipe ya Arsenal.
Semenyo niwe wafunguye amazamu mu minota icumi ya mbere, igitego yatsinze k’umupira yatereye hafi mu rubuga rw’amahina, Mu gihe Evanilson yinjijemo icyakabiri mu minota ya mbere bakiva kuruhuka.
Nubwo Josko Gvardiol wa Manchester City yagerageje kenshi gukura iyi kipe mu gisebo, ku munota 82 byaje ku muhira agiterekamo.
Abahungu bayobowe n’umutoza Guardiola bakomeje gusatira cyane nkaho mu minota y’inyongera rutahizamu Erling Haaland yateye umupira igiti cy’izamu, mu gihe mugenzi we Phil Phoden yakomeje guterera amahirwe menshi yabonaga inyoni, byaje no gutuma ikipe ya Bournemouth itahana amanota atatu yayo imbumbe ku ntsinzi ya 2-1, maze Guardiola n’ingabo ze basubira mu majyaruguru y’Ubwongereza amara masa.
Ikipe ya Man City yahise itakaza umwanya wa mbere ijya ku wa kabiri nyuma yo kunanirwa kubyaza umusaruro intsinzwi ya mukeba wayo Arsenal watsindirwaga kuri stade yitiriwe mutagatifu Yakobo y’ikipe ya Newcastle iherereye mu rusisiro rwa Tyneside. Ku rundi ruhande ho, ikipe ya Bournemouth yahise izamuka ku rutonde aho yahise yisanga ku mwanya wa munani.
Iyi ntsinzwi yasize gutekereza kwinshi mu mitwe y’abafana bo mu mujyi wa Manchester dore ko,yakuyeho agahigo k’imikino 32 ikipe ya Man City yari imaze idatsindwa muri shampiyona y’umupira w’amaguru mu gihugu cy’Ubwongereza. Ibi byahise bishimangira ko, ikipe imwe yatwaye igikombe idatsinzwe umukino n’umwe mu bwongereza ikomeza kuba Arsenal yonyine Aho yabikoze mu 2004.
umutoza Pep Guardiola ntiyumva uburyo ikipe ye ikomeje gutakaza imikino y’ingenzi
Mu buryo butunguranye ikipe ya Bournemouth iri mu ziri gukubagana cyane aho nayo iri kuzamura urwego mu buryo komeye dore ko ubu, ibonye intsinzi ya gatatu yikurikiranya, tutiyibagije ko izi ntsinzi yazikuye ku makipe ahora muri enye za mbere(big four).
Iyi ikaba ibaye inshuro ya kane Bournemouth bakunze kwita (The cherries) Ibonye intsinzi 3 zikirikiranya muri shampiyona y’ikiciro cya mbere mu Bwongereza nyuma yo kubikora inshuro eshatu zitandukanye, mu Kwakira 2016, muri Gashyantare 2018 ndetse no muri Mata 2024.