Ikipe nziza y’umwaka muri Premier league 2024/2025 kugeza magingo aya
Nkuko mubizi turi mu mpera z’umwaka, shampiyona y’ikiciro cya mbere mu Bwongereza cyo kimwe n’izindi nyinshi ku mugabane w’Uburayi zigeze mu gice cyiryoheye ijisho ry’umufana.
Uyu munsi DailyBox yifashishije ikinyamakuru Skysports yaguteguriye inkuru ivuga ku ikipe nziza y’uyu mwaka w’imikino ugikomeza magingo aya.
Mu ikipe nziza twabateguriye haribandamo abakinnyi bitwaye neza ahanini mu gice kibanza cya shampiyona mbere y’umunsi mukuru wa Noheli.
Twifashishije urutonde rwa shampiyona turasanga ikipe ya Liverpool iyoboye urutonde aho irusha iziyikurikira amanota 4 mu gihe ifite umukino umwe w’ikirarane.
Abakeba babiri bo mu murwa mukuru wa London aribo Chelsea na Arsenal bakurikira Liverpool ku mwanya wa 2 n’uwa 3 by’agateganyo mu gihe ikipe ya Nottingham Forest yisanga ku mwanya wa Kane mu buryo butunguranye.
Ibi biri mu bikomeje gutuma shampiyona y’ikiciro cya mbere mu Bwongereza iba ntagereranywa mu gihe bigoranye kuba wayigereranya n’izindi i Burayi.
Ikipe y’umwaka 2024/2025 kugeza magingo aya (4-2-3-1)
Mu izamu (Matz Sels wa Nottingham forest)
Muri shampiyona irimo Alisson Becker, Ederson Moraes, Andre Onana n’abandi benshi ntibibuza umunyezamu w’ikipe ya Nottingham forest kuba ari we witwaye neza, nubwo amakipe nka Chelsea, Liverpool na Arsenal ziri imbere ye ntibibuza ko abatoza bayo batekereza cyane ku munya-Portugal Nuno Espirito Santo utoza ikipe ya Nottingham.
Matz Sels yamaze imikino itandatu atinjizwa igitego agahigo ahuza na Andre Onana wa Manchester united ndetse na David Raya wa Arsenal, mu gihe kandi ikipe ye imaze kwinjizwa ibitego 19 aho irushwa n’amakipe ya Arsenal na Liverpool zifite ubwugarizi bwiza kugeza ubu.
Ninde wari uzi ko Nottingham forest yagira intangiriro nziza nk’izi ?
Ku ruhande rw’inyuma I Bumoso ( Antonee Robinson wa Fulham)
Uyu mugabo bakunze gutazira Jedi akwiriye amashimwe Koko, dore ko n’urubuga Fotmob rumuha 7.4 ku 10. Imikino yose yakinwe yarayikinnye, niwe myugariro umaze gutanga imipira myishi yavuyemo ibitego, ni ibintu byiza ku mutoza Marco Silva wa Fulham gusa bikaba iby’agahebuzo kuri Mauricio Pochettino uzaba amufite mu ikipe y’igihugu ya Leta zunze ubumwe z’Amerika.
Myugariro w’inyuma hagati (Gabriel Magalhães wa Arsenal )
Ni he Arsenal iba ibarizwa iyo itaza kugira imipira y’imiterekano ? Ikibazo cyiza cyane
Ni myugariro wigaragaje cyane, ahanini mu kugira uruhare mu gutsinda imipira y’imiterekano ndetse no kugarira imipira yo mu kirere ahanini afatanyije na mugenzi we William Saliba.
Uyu akaba yarabashije gutsinda ibitego 3, ndetse agatanga n’umupira 1, wavuyemo igitego mu mikino 15, ibintu bimugira mwiza kugeza magingo aya muri shampiyona.
(Virgil van Dijk wa Liverpool)
Uyu myugariro w’ikipe ya Liverpool aza mu bakinnyi beza ikipe ya Liverpool yagize mu gihe kandi aza mu beza umupira w’amaguru ku isi wagize muri rusange.
Nkuko twabivuze ikipe ya Liverpool iri mu zifite ubwugarizi bukomeye dore ko imaze kwinjizwa ibitego 16, gusa. Biragoranye ko hatazaboneka ikipe ikuraho agahigo kashyizweho na Mourinho, gusa mu gihe Virgil, yakomeza kwitwara neza gutya nta kabuza yafasha ikipe ye gutwara igikombe.
Myugariro w’iburyo ( Trent Alexander Arnold wa Liverpool)
Uyu musore nawe ari mu bahagaze neza dore ko amaze gutanga imipira ine yavuyemo ibitego mu gihe afite amanota 7.43, ku 10, muri rusange. Ntiyabashije gutangira imikino 15, yose yakinwe gusa akomeje kugaragaza ko afite umupira mwishi ku kirenge.
Mu gihe byamuhira agakomeza kwitwara gutya birashoboka ko nawe yakisanga yahesheje ikipe ye ya Liverpool, igikombe.
(Ryan Gravenberch wa Liverpool)
Ni we mukinnyi ubanziriza uwa nyuma mu bo ikipe ya Liverpool ifite muri uru rutonde ndetse ari mu bakinnyi bagaragaje ko gukora bizamura nyirikubikora.
Uyu yasaga n’uwihebye ku ngoma y’umutoza Jurgen Klopp gusa kuza kwa Arne Slot, byamuhaye amahirwe yo kwigaragaza.
Ubu ni ntakuka muri 11, batangira ba Liverpool, ndetse ari no mu beza shampiyona y’Abongereza ifite magingo aya akaba afite amanota 7.50.
(Moises Caicedo wa Chelsea)
Kugeza magingo aya ikipe ya Chelsea, yatangira kwikomanga mu gatuza maze ikemeza ko Caicedo yaguze muri Brighton and Hoove Albion ari we.
Uyu mugabo ukomoka mu gihugu cya Ecuador amaze kugira uruhare mu bitego 3 mu mikino 17, amaze gutangira mu kibuga.
(Bukayo Saka wa Arsenal)
Nubwo akunze gukinishwa mu mwanya utari uwe Bukayo Saka, amaze kugira uruhare mu bitego 16. Biragoranye kuvuga ko haraho wageze tukiri mu minsi mikuru gusa mu gihe ikipe ya Arsenal yatwara igikombe izahore ishimira umukinnyi Bukayo Saka, magingo aya Bukayo Saka akaba afite imvune aho biteganyijwe ko azamara imikino mike hanze y’ikibuga.
(Cole Palmer wa Chelsea)
Cole Palmer, akomeje kugaragaza ko ari umukinnyi ukomeye haba ku bwa Mauricio Pochettino, ndetse no kugeza ubu kuri Enzo Maresca.
kugeza ubu ni uwa gatatu mu bafite ibitego byinshi aho amaze kugira uruhare mu bitego 17, mu mikino yose amaze gukina.Ntitwibagirwe ko aherutse guca agahigo ko gutsinda ibitego 4, mu gice cya mbere cy’umukino ubwo bahuraga n’ikipe ya Brighton and Hove Albion.
Birashoboka cyane ko Cole Palmer, yakongera akegukana igihembo cy’umukinnyi mwiza ukiri muto w’umwana nkuko yari yabikoze umwaka ushize.
( Mohamed Salah wa Liverpool)
Uyu we ni ntashidikanywaho, ni we mukinnyi wanyuma w’ ikipe ya Liverpool, ugaragara kuri uru rutonde mu gihe kandi iyi kipe itazi neza niba azakomezanya nayo mu mpera z’uyu mwaka.
Urakeka ko ikipe ya Liverpool, izemera kurekura umunyabigwi ufite agahigo ko gukora imibare iri hejuru y’icumi haba mu bitego(15) n’imipira yavuyemo ibitego (11) mbere y’umunsi mukuru wa Noheli. Birashoboka cyane ko icyemezo icyo Ari cyo cyose kizafatwa gishobora kuzagira ingaruka mbi cyangwa nziza ku musaruro we icyumweru ku kindi.
Yego ntiwamenya ibiri mu bitekerezo by’abafata ibyemezo i Liverpool, gusa umusaruro w’uyu Munyamisiri ni mu gihe bishoboka cyane kandi ko mu gihe Liverpool yabona igikombe nawe yabona ibihembo birimo na Ballon d’or.
Rutahizamu (Alexander Isak wa Newcastle United)
Uwa nyuma uza ku rutonde ni umukinnyi wa Newcastle United Alexander Isak ukomoka mu gihugu cya Sweden. Ikipe ya Newcastle united iri kureba uburyo yakwinjira muri 4 za mbere mu gihe kuzahuka kwayo ahanini kuzashingirwa kuri Alexander Isak.
Isak, yagize uruhare mu bitego 14, uyu mwaka mu mikino 15, amaze kubanzamo akaba afite amanota 7.43, ku mwanya we. Aherutse kugira amanota 9.7, ubwo bakinaga na Ipswich Town, ndetse n’amanota 9.0, bakina na Leicester City.