Igiraneza Lucky Fabrice na Terimbere Ineza Alia Ange Stevine nibo bagize amanota meza y’ibizamini bya Leta bisoza amashuri abanza ndetse n’icyiciro rusange cy’amashuri yisumbuye
Minisiteri y’Uburezi imaze gutangaza ku mugaragaro amanota y’ibizamini bya Leta bisoza amashuri abanza ndetse n’icyiciro rusange cy’amashuri yisumbuye umwaka w’amashuri wa 2023/2024. Ni igikorwa cyabereye ku cyicaro gikuru cy’Ikigo cy’Igihugu Gishinzwe Ibizamini n’Ubugenzuzi bw’Amashuri, NESA.
Mu banyeshuri bahize abandi muri ibi bizamini harimo:Igiraneza Lucky Fabrice wigaga mu Ishuri rya The Pioneer School riherereye mu Karere ka Bugesera, yabaye uwa mbere mu gutsinda neza ibizamini bya Leta by’amashuri abanza.
Mu gihe Terimbere Ineza Alia Ange Stevine wigaga muri Lycée Notre-Dame de Cîteaux, yabaye uwa mbere mu gutsinda neza ibizamini bya Leta bisoza Icyiciro Rusange cy’amashuri yisumbuye mu Rwanda.
Minisitiri w’Uburezi, Twagirayezu Gaspard, yagaragaje ko abanyeshuri bo mu mashuri abanza batsinze imibare ku kigero cya 71,9%. Mu bijyanye na siyansi abanyeshuri batsinze ku kigero cya 99,5%, mu Kinyarwanda batsinda kuri 99,5%, Icyongereza batsinda kuri 90,7% ndetse ko Abanyeshuri 93,8% batsinze ibizamini bya Leta bisoza Icyiciro Rusange cy’amashuri yisumbuye, aho abakobwa batsinze ku kigero cya 92% mu gihe abahungu batsinze kuri 95,8%
Uyu muyobozi yakomeje avuga ko amasomo batsinze cyane ari siyansi n’Ikinyarwanda mu gihe Minisiteri w’Uburezi yagaragaje ko hakenewe kongerwa imbaraga mu mibare ndetse n’icyongereza.
Mu cyiciro rusange abahungu barushije abakobwa kuko batsinze ku kigero cya 95.8%, mu gihe abakobwa batsinze ku kigero cya 92%. Ni ibizamini byakozwe n’abanyeshuri 143227, barimo abakobwa 79933 n’abahungu 63294.
