Icyo amategeko n’amabwiriza bya CAF bivuga ku birego Guinea ishinja Tanzania
Ikipe y’igihugu ya Tanzania bakunze kwita (Taifa stars) irashinjwa na Guinea kuba yarakinishije umukinnyi ufite nimero itandukanye n’iri ku rupapuro rw’umukino, ibintu bihanwa n’amategeko y’umukino mu marushanwa ya CAF.
Mu mukino wo gushaka itike y’igikombe cy’Afurika uherutse kuba ubwo iki gihugu cyatsindaga silly national ya Guinea ndetse bigahita byemezwa ko Tanzania ariyo ibonye itike nyuma yo gukurikirana n’ikipe ya Repubulika Iharanira Demokarasi ya Congo yo yari iyoboye itsinda rya H, byagaragaye ko ku minota wa 76 ikipe y’igihugu ya Tanzania yinjije nimero 26 Ibrahim Ame ubwo yasimburaga kapiteni Mbwana Ally Samatta.
Ibirego ikipe y’igihugu ya Tanzania ishinjwa
Mu kirego ikipe y’igihugu ya Guinea yatanze muri CAF igaragaza ko Ibrahim Ame wari wambaye nimero 26 mu mugongo we, nta hantu na hamwe agaragara ku mpapuro z’umukino, birenzeho Guinea ikaba yongera igashinja abarebera inyungu za ruhago muri Tanzania guhindura amasaha y’umukino nkana ugakurwa saa 19:00 ukazanwa saa 15:00 ku manywa ibintu Abanya-Guinea bavuga ko byagize ingaruka mbi ku bakinnyi babo bamenyereye ikirere cy’i Burayi.
Ikirego cya gatatu Guinea itanga n’ikijyanye n’abakomiseri b’umukino aho ishinja CAF ivuga ko bakomoka mu gihugu cya Kenya, ibintu bahuza no kuba Kenya ibarizwa mu karere kamwe na Tanzania.
Icyo amategeko ya CAF abivugaho
Ingingo ya 50 y’amabwiriza ya CAF ivuga ko,”Imyambaro y’abakinnyi igomba kuba ihura n’imyirondoro yatanzwe muri CAF”.
Ibi bikaba bijyana n’amabwiriza y’imyambarire ya CAF yavuguruwe mu 2013 mu ngingo za 10.01, 10.05, 15.08, 16.07, 23.07 n’iya 26.04 zivuga ko ” Imyambaro y’abakinnyi ari ikimenyetso gikomeye kifashishwa mu muyoboro wo gutandukanya abari gukina mu kibuga”.
Icyo ibihano biteganya
Ingingo ya mbere y’ibihano CAF iteganya ko ikipe yagaragayeho ibyo Tanzania iregwa.
Bitewe n’uko iri kosa ribuza ifatwa ry’ibyemezo by’umusifuzi ahanini bitewe n’urujijo mu myirondoro, Bitewe kandi n’uko ikosa ryakozwe rituma hari amakuru atamenyekana ku mukinnyi wakandagiye mu kibuga mu buryo butemeranyije n’amategeko ndetse uwakandagiye mu kibuga akaba aba yakinnye mu buryo bwa magendu, CAF iteganya ibihano bikurikira.
Ibihano biteganywa na CAF ku ikipe yakinishije umukinnyi utemewe
Ingingo ya 42.12 y’amategeko ya CAF iteganya ko:
“Mu gihe, umukinnyi wambaye nimero 26 atandikishijwe kuri iyo nimero mu mpapuro z’umukino, bivuze ko muri make uwo mukinnyi atemerewe gukina uwo mukino”.
Ingingo ya 47 y’ amategeko ya CAF ivuga ko:
” Mu gihe hagaragaye ikosa iryo ari ryo ryose ryerekeye iyandikishwa ry’imyirondoro y’umukino, ikipe iregwa iyo biyihamye ihita ihanishwa gukurwaho amanota y’uwo mukino ndetse igahita iterwa mpaga y’ibitego bitatu”.
Biteganyijwe ko igihugu cya Tanzania kiza gusubiza ku birego kiregwa mu gihe Ishyirahamwe ry’umupira w’amaguru ku mugabane w’Afurika (CAF) ryo ntacyo riratangaza ku birego byatanzwe na Guinea.
