Ikipe ya Police Handball club yatsinze umukino wayo wa mbere wayihuje na General Service Unit ya Polisi ya Keny mu irushanwa rihuza amakipe yo mu bihugu bihuriye mu muryango w’ubufatanye uhuza Abayobozi bakuru ba Polisi mu Karere k’Afurika y’Iburasirazuba (EAPCCO).
Ni irushanwa ryatangiye kuva ku itariki ya 27 Mata, rikaba ryaritabiriwe n’amakipe ya Polisi zo muri aka karere akina imikino itandukanye .
Umukino wa mbere wahuje Police HC na General Service Unit yo muri Kenya, warangiye Police HC yegukanye intsinzi y’ibitego 39 kuri 29 bya General Service Unit.
Ku isaha ya saa tatu zo muri Ethiopia ari zo saa mbiri za hano mu Rwanda, nibwo umukino wari utangiye muri sitade yitwa Ethiopia Sports Academy, iherereye mu murwa mukuru w’icyo gihugu, Addis Abeba, iminota 30 y’igice cya mbere iza kurangira Police HC ifite ibitego 19 ku bitego 16 bya General Service Unit ya Kenya.
Imikino ya EAPCCO Games iheruka yabereye mu Rwanda mu mwaka wa 2023.
Ni ku nshuro ya 4, ikipe ya Police HC yitabiriye iyi mikino ya EAPCCO Games ibaye ku nshuro yayo ya 5, aho muri izo nshuro yatwaye ibikombe inshuro 3 zose.
