Guhera ku mugoroba wo ku munsi wejo ku wa mbere tariki ya 21 Mata 2025 ,Imirwano ikomeye hagati y’umutwe wa M23 ndetse Wazalendo yongeye kubura mu gace ka Masisi muri ntara ya Kivu y’amajyaruguru muri Repubulika iharanira demokarasi ya Kongo .
Amakuru agera kuri Daily box yemeza ko iyi mirwano hagati ya M23 na Wazalendo ahanini yibasiye imidugudugu ya Bibatama , Nyamaboko na Mungote ndetse bikavugwa ko abataramenyekana umubare baburiyemo ubuzima .
Nubwo nta mibare nyayo y’ababuriye ubuzima muri iyi mirwano yari yatangazwa n’inzego z’ubuzima zo muri kiriya gihugu , sosiyete sivile yo muri kariya gace yo yatangaje ko byibuze abarenga ijana babaruwe ko bamaze kuvanwa mu byabo n’uru rusaku rw’imbunda .
Umutwe wa Wazalendo uri guhangana na M23 mu rwego rwo gufasha igisirikare cya Repubulika iharanira Demokarasi ya Kongo guhangana n’uyu mutwe umaze kwigarurira imwe mu mijyi ikomeye yo mu burasirazuba bw’iki gihugu irimo Bukavu na Goma yafatwaga nk’imirwa mikuru y’intara ya za Kivu zombi.
Ku rundi ruhande ,umutwe wa M23 utangaza ko ari ihuriro ry’Abanyekongo barwanira uburenganzira bwabo bumaze igihe kirenga imyaka 30 buhonyorwa n’abategetsi ba leta ya Kinshasa uko bagiye basimburanwa muri iyi myaka yose, DRC yo iwushinja gukorerwamo n’ibihugu by’amahanga bishaka kwisahurira imitungo kamere iboneka muri iki gihugu byiganjemo iby’ibituranyi .
