Chelsea izayobora umupira w’Abongereza mu myaka izaza : Enzo Maresca
Umutoza w’ikipe Chelsea, Enzo Maresca, yatangaje ko ikipe atoza ifite ubushobozi bwo kuyobora ruhago y’ Abongereza hagati y’imyaka itanu n’icumi iri mbere.
Uyu Mutaliyani w’imyaka 44 ntahwema kuvuga ko ikipe ye itari mu zigomba guhatanira igikombe n’ubwo magingo aya afite amahirwe menshi dore ko ikipe ye ari iya gatatu ku rutonde aho anganya ibintu byose n’ikipe ya Arsenal, ya kabiri ku rutonde.
Ikipe ya Chelsea, ikaba iherutse kunyura ku ikipe ya Manchester City, nyuma y’uko ibashije kunyagira ikipe ya Aston villa ibitego bitatu ku busa ni mu gihe Manchester city, ifite igikombe bikomeje kuyibera bibi cyane aho yo iri kubarizwa ku mwanya wa kane nyuma yo kumara imikino 6 itazi igisa n’intsinzi.
Iyo uteye akajisho mu rwambariro rw’ikipe ya Chelsea, ntutinda kwibwira ko iyi kipe yahashye bikomeye dore ko iri muzashoye menshi mu myaka yatambutse.
Chelsea imaze gushora angana na miliyari imwe n’igice mu igura ry’abakinnyi aho abenshi mu baguzwe higanjemo abakiri bato kandi bafite amasezerano y’igihe kirekire.
Umutoza Maresca, avuga ko ikipe ye ifite ikibazo cy’uburambe ndetse anyuzamo akavuga ko ubwo bazaba bafatishije ikipe ye ntawuzayikira. Nubwo avuga ibyo byose ariko ntibibuza itangazamakuru kuvuga ko amazina nka Cole Palmer, waguzwe muri Manchester city, Moise Caicedo, wavuye muri Brighton & hoove Albion, ndetse n’umunya-Senegal Nicolas Jackson, ari amazina akomeye ku buryo atakabaye yitwaza iby’uburambe mu kibuga.
“Ntabwo turi mu bahatanira igikombe oya.. ntabwo turimo,” amagambo y’umutoza Maresca.
Ubwo yakomezaga ikiganiro yagiranye n’itangazamakuru mbere y’umukino wa shampiyona ikipe ye ifitanye na Southampton yakomeje gushimangira no kumenyesha abamubazaga, ko icyo yazaniwe atari igikorwa cy’igihe gito ndetse ahera ho avuga ko iyo urebye imishinga y’ikipe ya Chelsea usanga ari imishinga y’igihe kirekire harimo nko kugurwa kw’abakinnyi bakiri bato gushora mu marerero ndetse n’ibindi byinshi ashingiraho yumvisha uwari we wese ko iyi kipe izaba ikomeye mu bihe bizaza.
Chelsea yasoje ku myanya ya 12 na 6 mu myaka ibiri ya mbere y’umuherwe Todd Boehly aho nta gikombe nakimwe babashije gutwara, gusa nyuma yo kuza kwa Enzo Maresca ibintu batangiye kujya mu gitereko.
Abajijwe uko abakinnyi be bahagaze mbere y’umukino iyi kipe izakirwamo na Southampton ku kibuga kitiriwe Mutagatifu Mariya, yavuze ko,abakinnyi bafite imvune ari Reece James uzamara hanze igihe kinini mu gihe Wesley Fofana nawe agomba kumara ibyumweru bike mbere yo kugaruka mu kibuga.