Carlo Ancelotti utoza Real Madrid yashyize umucyo ku bivugwa k’ubuzima bwa Kylian Mbappe
umukambwe Carlo Ancelotti, usanzwe ari umutoza mukuru w’ikipe ya Real Madrid, yahakanyije abakomeje gutangaza amakuru we yise ibinyoma avuga ko rutahizamu Kylian Mbappe, amaze igihe kinini ahanganye n’ibibazo by’ubuzima bwo mu mutwe.
Ubwo yari mu ikiganiro n’itangazamakuru mbere y’umukino ikipe ya Real Madrid yatsinzemo Leganes, 3-0, Ancelotti yavuze ko afitiye ikizere rutahizamu we ndetse yizeye ubuzima bwe, yaboneyeho avuguruza amakuru yavugaga ko rutahizamu we Mbappe afite ikibazo cy’ubuzima mu mitekerereze, ibintu Ancelotti yagereranyije n’ibihuha by’umwanda.
Aho yagize ati : “siko mbitekereza. Mbona ameze neza kandi yishimiye kuba ari hano.Sinkeka ko arwaye Koko, kandi niba anarwaye ntabyo agaragaza,” Ancelotti yongeyeho ati:”N’ibintu bigaragara nabi gukwirakwiza ibihuha nkibyo”.
Ibi bikaba bikomeje kuvuga nyuma y’uko uyu avuye mu ikipe ya Paris Saint Germain akazira kubuntu I Madrid, rutahizamu Kylian Mbappe yakomeje kuvugwaho kutishimira
umwanya akinishwaho mu ikipe ya Real Madrid ndetse ibinyamakuru byinshi biratangaza ko Mbappe amaze kurambirwa gukina ayoboye ubusatirizi.
Hashize iminsi bivugwa ko Kylian Mbappe atameranye neza n’umutoza we mu ikipe y’igihugu Didier Deschamps, dore ko amaze imikino ine atamuhamagara mu ikipe y’igihugu. Ndetse ibi byarushijeho gukaza umurego ubwo Deschamps yatangazaga ko abakinnyi benshi bahura n’ihungabana akenshi riterwa n’imbuga nkoranyambaga mu gihe ingengabihe icucitse y’imikino nayo iza yiyongera mu bigora abakinnyi.Aha Deschamps anyuzamo akavuga ko nubwo hakina amaguru ariko amabwiriza aturuka mu mutwe.
“Twagiye tubona Abakinnyi benshi bakomeye bahindura amakipe bikabanza kwanga gusa mpamya ko Kylian Mbappe we bizageraho bigacamo, ibihe bibi bibaho kandi kuba afite impano byo ntitubitindaho”.Amagambo y’umutoza Carlo Ancelotti.
Abajijwe impamvu Mbappe amaze igihe atitabira imikino mpuzamahanga, Ancelotti yavuze ko byabaye byiza kuko icyo gihe yakifashishije mu gukora imyitozo ihambaye ndetse ageraho ashimangira ko, vuba aha turabona rutahizamu twari tumenyereye.
Ni byiza ku rundi ruhande kuko impande zombi zifitanye imyenda haba ku bafana bafite amatsiko yo kubona Mbappe agaruka mu bihe byiza ndetse na Mbappe ubwe ushaka gucecekesha abo bamuvuga.