Bukavu : M23 yakiranywe urugwiro rudasanzwe ! [AMAFOTO ]
kuri iki cyumweru tariki ya 16 Gashyantare 2025 , Bamwe mu baturage bo mu mujyi wa Bukavu bahaye ikaze abarwanyi b’umutwe wa M23 wamaze kuwinjiramo ndetse uyu mutwe ni nawo urinze umupaka uhuza u Rwanda na DRC ku ruhande rwo mu karere ka Rusizi .
Amakuru agera kuri Daily Box yemeza ko guhera saa yine zo kuri iki cyumweru , abarwanyi ba M23 aribo bari kugenzura umupaka w’i Rusizi ku ruhande rwa DRC ndetse ko abakozi bashinzwe abinjira n’abasohoka ba leta ya Kongo bataye akazi barahungisha amagara yabo .
Impaka n’ukwibaza bikomeje kuzamura urwego muri rubanda , aho buri wese ari kwibaza uburyo ingabo za FARDC zabererekeye inyeshyamba za M23 zigafata uyu mujyi wa Bukavu usanzwe ari umurwa mukuru w’intara ya Kivu y’amajyepfo nta kurasanya kubayeho .
Gusa impuguke muri politike yo mu karere twabashije kuganira zatubwiye ko impamvu y’ibi yatewe n’ifatwa ry’ikibuga cy’indege cya kavumu giherereye nko mu bilometero 25 uvuye i Bukavu byanatumye byoroha cyane kwigarurira uyu mujyi .
Nyuma y’amasaha make y’ifatwa rya Kavumu , ku mbuga nkoranyambaga hahise hatangira gucicikana amashusho yerekana inyeshyamba za M23 zifite ibirwanisho byazo zinjira uyu mujyi ndetse andi anerekana abasirikare b’ingabo z’u Burundi na DRC barimo bakiza amagara yabo .
Umujyi wa Bukavu ni ikindi gikorwa gikomeye umutwe w’inyeshyamba za m23 ugezeho nyuma yuko ku wa 27 / Mutarama /2025 utangaje ko wigaruriye umujyi wa Goma akaba n’umurwa mukuru w’intara ya Kivu ya Ruguru .
