Bénin isabwa gutsinda Amavubi ikajya mu gikombe cya Africa yageze mu Rwanda mu kizere kinshi
Ikipe y’Igihugu ya Bénin yageze i Kigali saa mbiri n’iminota 25 ku mugoroba wo kuri iki Cyumweru nyuma yo gukora urugendo rw’amasaha atanu n’iminota 15 mu ndege bakaba baje gukina umukino wo kwishyura uzabera kuri sitade Amahoro.
Bénin yatsinze umukino ubanza ibitego bitatu ku busa bw’Amavubi(3-0) umukino wabereye Felix Houphouet Boigny mu gihugu cya Ivory Coast dore ko iyi kipe idafite sitade yemewe n’impuzamashyirahamwe y’aruhago muri Africa “CAF” muri uwo mukino bakaba baratsindiwe na Steve Michel Mounié ku munota wa 7’ , Andréas Hountondji ku munota wa 67’ ndetse n’igitego cya Imourane Hassane cya gatatu ku munota 70’ .
Iyi kipe ije I Kigali ifite gahunda yo kubona amanota atatu kubera ko bizahita biyiha amahirwe yo kubona itike y’iyimikino y’igikombe cya Africa kizabera muri Morocco 2025 dore ko bahita bagira amanota icyenda bisobanuye ko bahita babona itike.
Ni umukino ugomba kuba kuri uyu wa kabiri tariki ya 15 Ukwakira 2024, ku isha y’i saa kumi n’ebyiri z’umugoroba ukazabera kuri sitade Amahoro ndetse ishyirahamwe ry’aruhago mu Rwanda riherutse kuvugurura ibiciro byo kwinjira kuri uyu mu kino hagamijwe gukurura abakunzi b’umupira w’amaguru ku bwinshi.
Aho itike ya make yagizwe 1000 Frw ku bazagura mbere mu myanya isanzwe yo hejuru no hasi, ni mu gihe ku munsi w’umukino, amatike azakomeza kuba 2000 Frw, 10 000 Frw, 30 000 Frw, 50 000 Frw na 1 000 000 Frw.
Ni nako ku mugoroba wo kuri iki Cyumweru tariki ya 13 Ukwakira 2024 , ikipe y’igihugu y’u Rwanda “Amavubi” yakoreye imyitozo muri Stade Amahoro aho azakinira nyuma yo gusesekara I Kigali bakubutse iya Abidjan, muri Ivory Coast.
Aya makipe yombi aherereye mu itsinda D aho riyobowe n’ikipe y’igihugu ya Nigeria “Super Eagles” ikaba ifite amanota arindwi bakaba bafite umukino n’ikipe y’igihugu ya Libya kuri uyu wa kabiri tariki ya 15 Ukwakira 2024, muri iritsinda hakurikiraho ikipe y’igihugu ya Bénin “ Les Guépards” n’amanota atandatu.
Ku mwanya wa gatatu niho ikipe y’igihugu y’u Rwanda “Amavubi” ibarizwa n’amanota abiri ikaba iri mu mwenda w’ibitego bitatu , ikipe y’igihugu ya Libya “Knights of the Mediterranean” niyo ifunga urutonde n’inota rimwe.
Igikombe cya Africa cya 2025 kizabera mu gihugu cya Morocco ,amakipe yamaze kubona amatike n’ikipe y’igihugu ya Morocco izakira iyi mikino ndetse n’ikipe y’igihugu ya Burkina Faso “Les Étalons” yabonye tike nyuma yo gutsinda ikipe y’igihugu y’Abarundi ibitego bibiri ku busa(2-0).
Bituma yuzuza amanota 10 imbere ya Senegal ikipe y’igihugu y’Abarundi “Intambamurugamba” ndetse na Malawi ifunga urutonde muri iri tsinda rya L ari naryo ryanyuma.