Amb . Busingye yerekanye umusaruro wavuye mu Ihuriro ry’Ubucuruzi n’Ishoramari hagati y’u Rwanda n’u Bwongereza

• X
• Facebook
• Instagram
• WhatsApp

Ambasaderi w’u Rwanda mu Bwongereza, Busingye Johnston, yavuze ko iri murikabikorwa ryiswe ‘Taste of Rwanda’ rihuza abagira uruhare mu rwego rw’ubuhinzi n’ubucuruzi hagati y’ibihugu byombi.

Amb Busingye yavuze ko iri murikabikorwa ari umusaruro wavuye mu Ihuriro ry’Ubucuruzi n’Ishoramari hagati y’u Rwanda n’u Bwongereza ryabaye muri Mutarama 2024.Ati “Uyu munsi twubakiye ku byagezweho mu kwagura umubano mu by’ubucuruzi no kugaragaza ibyo u Rwanda rufite mu buhinzi bw’indabo.”

Raporo y’Ikigo cy’Igihugu Gishinzwe Guteza Imbere Ibyoherezwa mu Mahanga Bikomoka ku Buhinzi n’Ubworozi, NAEB, yagaragaje ko ubuhinzi bw’indabo bwungutse ku kigero cya 96.6% ndetse indabo zoherejwe mu mahanga ziyongeraho 58.6%.

Imibare itangazwa na NAEB, yerekana ko ibijyanye n’indabo, imbuto n’imboga bikomeje gutanga umusaruro kuko nko mu 2022 byinjije miliyari 28.79 Frw avuye kuri miliyari 28.7 Frw yabonetse mu 2020/2021.Iyi mibare kandi igaragaza ko ubucuruzi bw’indabo bwazamutse cyane ku kigero cya 58.78% mu 2022 kugeza muri uyu mwaka aho Guverinoma y’u Bwongereza isobanura ko indabo u Rwanda rwohereje i Londres mu 2023 zari zifite agaciro k’Amapawundi ibihumbi 727 (miliyari 1,1 Frw)..

Abashoramari batandukanye bakomeje kugaragaza umwihariko mu guteza imbere ubu bucuruzi. Aha ni ho Uwacu Sandrine yahereye yinjira mu gutunganya indabo z’umwimerere zishobora kumara hafi umwaka zitangiritse.

Iri zamuka ry’umusaruro ryatewe n’uburyo isoko mpuzamahanga ryakomeje kwifuza umusaruro w’indabo. Ubu bushake bwakajije umurego mu bihe by’iminsi mikuru ifite igisobanuro gikomeye, irimo nk’Umunsi w’Abakundana n’indi nk’iyo.

Mu mwaka wa 2014 nibwo Leta y’u Rwanda yashyizeho ikigo cya Bella Flowers gikora ubuhinzi n’ubucuruzi bw’indabyo z’amaroza haba mu Rwanda no mu mahanga.