Aho kumushyira mu kibuga nashyiramo umukambwe : Ruben Amorim kuri Rashford
Amagambo ya Ruben Amorim avuga kuri Marcus Rashford_
Nubwo yatsinze ikipe ya Fulham ku cyumweru, ibintu si amahoro mu ikipe ya Manchester united, hagati y’umutoza w’iyi kipe Ruben Amorim, n’umukinnyi Marcus Rashford.
Amakimbirane y’aba bombi yatangiye mu byumweru bike bishize gusa ibintu byaje gufata indi ntera kuri uyu wa mbere nyuma y’amagambo y’umutoza Ruben Amorim wavuze ko aho gukinisha Rashford, ahubwo yamusimbuza umutoza w’abazamu ufite imyaka 63.
Ibi kandi bije nyuma y’imikino myishi uyu musore amaze atitabazwa n’uyu mutoza dore ko n’umukino uheruka wa Fulham, atigeze agaragara ku rutonde rw’abateganywa.
Mu mvugo itarimo uburyarya no kuzuyaza umutoza Ruben Amorim, aherutse kugaragaza ko Jorge Vital w’imyaka 63, usanzwe atoza abazamu yabona umwanya muri 11 ba Manchester united. ” Buri gihe impamvu ituma adakina ni imwe .” Impamvu ya mbere ni imyitozo, njye uko mbyumva umukinnyi w’umupira w’amaguru agomba kuba yitwara neza mu myitozo, mu buzima bwo hanze ndetse no mu buzima bwa rusange. Ibintu ni bidahinduka kandi sinzatezuka ku cyemezo cyanjye. Ni ibintu bireba buri mukinnyi, niba udatanga ibyo ufite byose biragoranye ko wabona umwanya i wanjye.” Amagambo y’umutoza Amorim avuga kuri Rashford.
Nta minsi myishi ishize uyu mutoza ataka ikibazo cy’abakinnyi bake mbere yo gutangaza ko yakinisha Vital w’imyaka 63, hejuru y’umukinnyi we, avuga ko adatanga ibyo afite byose.
Ku ruhande rw’umukinnyi Marcus Rashford we nta kibazo aragaragaza magingo aya ndetse akaba aherutse kugaragaza ibyishimo ku rukuta rwe rwa (instagram) ubwo yishimiraga intsinzi ya bagenzi be ku cyumweru, umukino wagaragayemo igitego kimwe cy’umunya-Arijantina Lisandro Martinez ku munota wa 78, ari nacyo cyatandukanyije impande zombi.
Biteganyijwe ko urugendo rw’imikino ku ikipe ya Manchester united rukomereza mu mikino ya Europa league mu gihe ku cyumweru iyi kipe igomba gucakirana na Crystal Palace mu mukino wa shampiyona.