Abungiriza ba Ruben Amorim bamenyekanye
Ikipe ya Manchester United yamaze gutangaza ko abatoza batanu bazakorana na Ruben Amorim bamaze kuhagera.
Uyu mugabo wahoze mu ikipe ya Sporting CP yahamagaje benshi mu bamufashije gutwara Primeira Liga ebyiri mu gihe cya Portugal mu mwaka wa 2020-2021 ndetse na 2023-2024.
Mu itangazo iyi kipe yashyize ku mbuga nkoranyambaga zayo yemeje ko Carlos Fernandes (Umutoza wungirije), Jorge Vital (Umutoza wa mbere w’abazamu), Adelio Candido (Umutoza ufasha mu ikipe nkuru) , Emmanuel Ferro (Umutoza ufasha mu ikipe nkuru) ndetse na Paulo Barreira (Umutoza wongerera imbaraga abakinnyi) bose bamaze kuhagera mu rugamba iyi kipe irimo rwo gushaka kugaruka ku gasongero k’izindi nyuma y’ibihe bibi iyi kipe imazemo iminsi kuva muri 2013.
Aba bakaba bazaza bahasanga Darren Fletcher wahoze akinira ikipe ya Manchester United(kuva 2002-2015) na Andreas Georgson bo bazaba bakora nk’abatoza b’ikipe ya mbere. Biteganyijwe ko ikizamini cya mbere kuri iri tsinda ry’abatoza bazagikorera ku kibuga Portman Road ku wa 24 Ugushyingo ubwo iyi kipe izaba ihura na Ipswich Town.
Ku rundi ruhande, kapiteni w’iyi kipe Bruno Fernandes yamaze gufata iyerekeza i Manchester guhura n’uwahoze ari umutoza we Ruben Amorim nubwo uyu yagiye mu Bwongereza ikipe ye y’igihugu ya Portugal ifite umukino ku wa Mbere izahuramo n’igihugu cya Croatia mu mikino ya UEFA nations league.
Fernandes yarekuwe n’umutoza Roberto Martinez nyuma yo kubona ikarita y’umuhondo mu mukino batsindagamo 5-1 igihugu cya Polonye byahise bimusibya urugendo rwerekeza i Zagreb dore ko, atemerewe gukina uwo mukino.
