Abanyuma bazatoranwamo umukinnyi mwiza wa Africa 2024 bamenyekanye
Impuzamashyiharamwe y’aruhago muri Africa “CAF” yatangaje urutonde rw’abakinnyi batanu bazatoranwamo umwe uzatwara igihembo cy’umukinnyi mwiza w’umwaka muri Africa.
Ni ibihembo bizatangwa ku itariki ya 16 Ukuboza 2024, hazaba ari ku munsi wa mbere bikazatangirwa mu gihugu cya Morocco, hashakwa ugomba gukorera mu ngata Umunya-Nigeria Victor Osimhen wakegukanya muri 2023 akiri mu ikipe ya Napoli.
Mu rutonde rw’abakinnyi batanu banyuma bayobowe n’umunya-Nigeria Ademola Lookman akaba akinira ikipe ya Atalanta mu Butaliyani, mu mwaka w’imikino ushize yatwaranye igikombe na Atalanta cya UEFA Europa League ndetse ku mukino w’anyuma yatsinze ibitego bitatu wenyine.
Umunya-Morocco Achraf Hakimi w’ikipe ya Paris Saint-Germain F.C. nawe ari muri batanu kandi ni umwe mu bitwaye neza mu mwaka ushize w’imikino nubwo ikipe ye nta UEFA Champions League yegukanye, bakaba baregukanye shampiyona gusa.
Serhou Guirassy Umunya-Guinea nawe azaba ari guhatanira iki gihembo , ni umwe muri barutahizamu watsinze ibitego bitari bike muri shampiyona y’igihugu y’Abadage mu mwaka w’imikino wa 2023-2024, mu ikipe ya VfB Stuttgart (yatsinzemo ibitego 28).
Umunya-Ivory Coast Simon Adingra w’ikipe ya Brighton & Hove Albion F.C. mu gihugu cy’Ubwongereza akaba yarafashije ikipe ye y’igihugu gutwara igikombe cya Africa batsinze Nigeria ku mukino w’anyuma.
Ronwen Williams umwe mu bazamu bitwaye neza mu gikombe cya Africa nawe yagize amahirwe yo kuza muri batanu b’anyuma bazahatanira iki gihembo cy’umukinnyi mwiza muri Africa umwaka wa 2024 ndetse uyu musore wa Mamelodi Sundowns F.C yagize amahirwe yo kwitabira ibihembo bya Ballon d’Or bya 2024.
Iki gihembo gitangwa na CAF kigahabwa umukinnyi uba witwaye neza mu gihe kingana n’umwaka w’imikino wose , kikaba cyaratangiye gutangwa mu mwaka 1992, kikaba kimaze kwegukanwa inshuro nyinshi na Samuel Eto’o ndetse na Yaya Touré umwe yagitwaye inshuro 4.