Menya byinshi ku ndwara ya Marburg yabonetse mu Rwanda
Kuri uyu wa gatanu , tariki ya 27 / nzeri /2024 Minisiteri y’ubuzima yatangaje ko mu Rwanda hamaze kuboneka abarwayi bake bagaragaza ibimenyetso by’indwara ya Marbug nubwo kugeza ubu iki kigo ntamakuru ahagije cyiyifiteho.
Minisiteri y’ubuzima ibicishije mu itangazo yashyize ahagaragara mu kanya gashize yatangaje ko mu bitaro bitandukanye biherereye mu rw’imisozi igihumbi hamaze kuboneka abarwayi bagaragayeho ibimenyesto by’indwara na virusi ya Marbug.
Iyi minisiteri kandi yatangaje ko hahise hashyirwaho ku ikubitiro ingamba zo kwirinda iyi ndwara haba mu bitaro cyangwa mu bigo nderabuzima bitandukanye hirya no hino mu gihugu gusa kuri ubu hatangiye igikorwa cyo kumenya abahuye n’abagaragaweho n’iyi virusi ,mu gihe abarwayi bakomeje kwitabwaho n’abaganga.
Inzego z’ubuzima zitangaza ko iyi ndwara ikwirakwizwa no gukora ku maraso n’amatembabuzi y’abantu bayirwaye gusa amahire ahari ni uko idakwirakwira binyuze mu mwuka nka COVID -19 .
Ikigo cy’igihugu gishizwe ubuzima [ RBC] kivuga ko uwo ari we wese wagaragarwaho bimwe mu bimenyetso by’iyi ndwara birimo kugira umuriro mwinshi ,umutwe ukabije ,kuruka, kuribwa n’imitsi cyangwa kuribwa mu nda ko yabimenyesha nimero itishyurwa y’iki kigo ya 114.
Kuri ubu imirimo irakomeje nk’ibisanzwe gusa abaturage barashishikarizwa gukomeza gukaza ingamba z’isuku mu gihe minisiteri y’ubuzima ikomeje gukurikiranira hafi amakuru ajyanye n’iyi ndwara.
Virusi ya Marburg niyo itera indwara ya Marburg (MVD), iyi ni indwara ifite umubare w’abahitanwa nayo batari bake,kuko ku kigero cya 88% y’abayirwaye bahitanwa nayo, ariko uyu mubare ushobora kuba hasi cyane hamwe no kwita ku barwayi neza. Indwara ya virusi ya Marburg yagaragaye bwa mbere mu mwaka wo mu 1967 mu gace ka Marburg na Frankfurt mu Budage ari naho bahereye bayiha iri zina.
Virusi ya Marburg na Ebola zombi ni izo mu muryango wa Filoviridae (filovirus). Nubwo zitera indwara zitandukanye, izo ndwara zombi zirasa mu buryo bw’ubuvuzi gusa icyo wamenya ni uko izi ndwara zombi zidasanzwe kandi zifite ubushobozi bwo gutera impfu nyinshi.
Marburg ikwirakwira binyuze mu kwanduzwa n’abantu baciye ku bandi bantu bayirwaye binyuze mu guhuza mu buryo butaziguye umubiri (binyuze mu ruhu rwacitse cyangwa ururenda) hamwe n’amaraso, ururenda, amavangingo cyangwa andi mazi yaturutse mu mubiri wanduye, hamwe no guhanahana ibikoresho (urugero nko kuryamana, no gutizanya imyenda) byandujwe n’ayo mazi y’umuntu wanduye. .
Abakozi bashinzwe ubuzima bakunze kwandura iyi ndwara mugihe bavura abarwayi bakekwaho cyangwa bemejwe ko bafite iyi ndwara[ MVD]. Ibi byaba mu buryo bwo guhura cyane n’abarwayi mu gihe ingamba zo kwirinda indwara zidakurikijwe zose uko zakabaye.OMS ivuga ko kuri uru rugero, abantu babona umuntu uyanduye nk‘umuzimu, amaso agatukura, isura igahinduka, agacika integer cyane.
Abantu benshi bahita batangira kuva amaraso mu bice bitandukanye by’umubiri, bagapfa mu gihe cy’iminsi icyenda kuva batangiye kurwara, kubera gutakaza amaraso menshi no kunegekara.
Uducurama two mu bwoko bwa ‘Fruit Bat’ akenshi nitwo tuba tubitse iyi virusi.Inkende zo muri Africa n’ingurube nazo zishobora kugendana iyi virusi.imiti hamwe n’ubuvuzi bwo kongererera ingufu umubiri (immunothérapie), bishobora gufasha umurwayi wayo, nk’uko OMS ibivuga.
Abaganga kandi bashobora kugabanya ubukana bwayo mu guha abarwayi ibintu byinshi byo kunywa no gusubizamo amaraso uwayatakaje.Gavi, ishirahamwe mpuzamahanga riteza imbere inkingo, risaba ko abantu bakwirinda kurya cyangwa gukorakora inyama zo mw’ishyamba.Ko kandi bakwirinda gukorakora ingurube mu turere twadutsemo iyo ndwara, nk’uko OMS ibivuga.
Abantu bigeze kwandura iyi virusi, mu mibonano mpuzabitsina yabo bogomba gukoresha agakingirizo igihe cy’umwaka kuva batangiye kubona ibimenyetso kugeza intanga zabo zipimwe incuro ebyiri bikagaragara ko nta virusi zigifite.
Kurundi ruhande kandi ,Imihango yo gushyingura irimo guhura n’umubiri wa nyakwigendera ishobora kandi kugira uruhare mu kwanduza Marburg.Indwara ziterwa na virusi ya Marburg itangira itunguranye, hamwe n’umuriro mwinshi, kubabara umutwe cyane no kurwara bikabije ibi bijyana no kubabara imitsi n’ububabare Impiswi ikabije y’amazi, kubabara mu nda no kuribwa, isesemi no kuruka birashobora gutangira kumunsi wa gatatu guhera igihe wanduriye gusa Izi mpiswi zavuzwe haruguru zishobora kumara icyumweru.
Ahabonetse virus ya Marburg ikomeye:
2017 – Uganda: abantu batatu nibo bayanduye, bose barapfuye
2012 – Uganda: 15 barayanduye, bane barapfuye
2005 – Angola: 374 barayanduye, 329 barapfuye
1998-2000 – DR Congo: 154 baranduye, 128 barapfuye
1967 – Ubudage: 29 baranduye, barindwi barapfuye
Kugeza ubu nta nkingo cyangwa imiti igabanya ubukana bwa MVD.
