Jean Baptiste Mugimba ufungiye Jenoside yatangaje ko adafashwe neza muri gereza afungiyemo
Urukiko rw’ubujurire mu Rwanda rwategetse urwego rw’ubushinjacyaha gukurikirana ibikorwa by’iyicarubozo bwana Jean Baptiste Mugimba avuga ko ari gukorerwa na gereza nkuru ya Nyarugenge iri i Mageragere. Ibyo byatumye Mugimba kuri uyu wa Kabiri yanga kuburana avuga ko gereza yasuzuguye ibyemezo by’urukiko bituma atabasha gutegura urubanza.
Iki cyemezo urukiko rw’ubujurire rwagifashe nyuma y’aho Jean Baptiste Mugimba avuze ko gereza nkuru ya Nyarugenge iri mu nkengero z’umujyi wa Kigali I Mageragere imukorera iyicarubozo.
Muri  2022 nibwo Urukiko rukuru rwakatiye Jean Baptiste Mugimba gufungwa imyaka 25 rumuhamije ibyaha byo gucura umugambi wo gukora jenoside, no kuba ikitso mu gukora jenoside.
Mugimba, wahoze ari umukozi wa Banki nkuru y’u Rwanda wafatiwe mu Buholandi akoherezwa mu 2016, yaburanye ahakana ibi byaha kandi yahise ajuririra icyo gihano.
Rwemeje ko Mugimba yayoboye inama y’ikiswe ‘comité de crise’ muri Mata (4) 1994 yabereye iwe mu rugo yakorewemo urutonde rw’abatutsi bagombaga kwicwa.Mugimba nubwo yahakanye ko nta nama nk’iyo yabereye iwe mu Nyakabanda nk’uko abatangabuhamya babivuze, kandi ko itariki bavuze yabereyeho yari yimukiye mu Kiyovu, akandi gace mu mujyi wa Kigali.
Mugimba, wahoze kandi ari akaba n’umunyamabanga w’ishyaka CDR, avuga ko ibyo aregwa ari ibihimbano by’abashaka kwigarurira imitungo ye.Urukiko rwamuhamije kuba icyitso mu gukora jenoside rwemeza ko yasabye imbunda kandi akazitanga, imbunda zicishijwe abatutsi mu murenge wa Nyakabanda.
Rwavuze ko nubwo nta bimenyetso bigaragaza ko ubwe yagiye mu bitero byo kwica mu Nyakabanda, ariko ko yagize uruhare mu gushyiraho bariyeri ziciweho abatutsi mu Nyakabanda, Nyamirambo, Biryogo na Gitega.
Kubera ibyo rwamuhamije icyaha cyo kuba icyitso cy’abakoze jenoside. Ruhita rutangaza ko rumukatiye gufungwa imyaka 25 kuri biriya byaha byombi.Mugimba yahise atangaza ko ajuririye iki cyemezo cy’urukiko rukuru.