Uwahoze ari umutoza wa Chelsea yagizwe umutoza w’ikipe y’igihugu y’Amerika y’umupira w’amaguru
Uwahoze ari umutoza wa Chelsea, Mauricio Pochettino, yagizwe umutoza mushya w’ikipe y’igihugu y’umupira w’amaguru y’abagabo ya Amerika (USA), nk’uko byatangajwe n’ubuyobozi bw’ishyirahamwe ry’umupira w’amaguru muri Leta zunze ubumwe z’Amerika.
Muri Gicurasi, Pochettino watandukanye n’ikipe ya Chelsea yo mu Bwongereza ikina Premier League nyuma y’umwaka w’imikino yari ayimazemo , azakomeza kuyobora ikipe y’igihugu ya Leta zunze ubumwe z’Amerika mbere no mu igikombe cy’isi 2026, kizaberayo hamwe na Mexico na Kanada.
Introducing… #USMNT Head Coach Mauricio Pochettino 🇺🇸
— U.S. Soccer Men's National Team (@USMNT) September 10, 2024
Uyu munya Argentine, wahoze utoza ikipe ya Paris Saint-Germain na Tottenham Hotspur, yavuze ko icyemezo cye cyo kujya gutoza Amerika kitarebaga inyungu ze mu rugendo rwe nk’umutoza w’umupira w’amaguru gusa, ahubwo ko ari ugushyigikira urugendo igihugu cyirimo kandi ko adashobora gutakaza aya amahirwe.
Mu magambo ye ku wa kabiri, yagize ati: “Ingufu, ishyaka, n’inzara yo kugera ku kintu cy’amateka hano ibyo ni ibintu byanteye imbaraga zo kuza hano.
Ati: “Ndabona itsinda ry’abakinnyi buzuye impano n’ubushobozi, kandi hamwe, tugiye kubaka ikintu kidasanzwe igihugu cyose gishobora kwishimira.”
Umuyobozi ushinzwe siporo muri Amerika, Matt Crocker, yatangaje ko Pochettino ari umutoza udasanzwe kandi ufite ishyaka ryinshi ku bakinnyi biteza imbere.Amerika ntiyari ifite umutoza uhoraho kuva yasezererwa rugikubita muri Copa America ku butaka bw’iwabo muri Nyakanga byatumye Gregg Berhalter yirukanwa wari umutoza mukuru.
Pochettino azatangira imirimo nyuma yuko Mikey Varas wagizwe umutoza w’agateganyo asoza amasezerano ye agomba kurangirana n’imikino ya gicuti na Kanada ku wa gatandatu ushize ndetse na Nouvelle-Zélande ku wa kabiri.
Amerika yanganyije na Nouvelle-Zélande 1-1 muri Cincinnati nyuma yuko igitego cya Christian Pulisic gihagaritswe na Ben Waine washyizemo icyo kunganya.Ubutaha bazakina umukino wa gicuti na Panama ku ya 12 Ukwakira na Mexico nyuma yiminsi itatu.
